Sports & Youth Services Department in ruahmanna a siam angin Serchhip District Sports Committee chuan vawiin chawhma dar 10:30 khan CMO Conference Hall Serchhipah a mamawh apiangte hman turin thisen pek runpui a buatsaih a, mipa - 42 leh hmeichhia -6 ten thisen unit – 48 an pe.
He hunah hian khuallian Pu R. Vanrengpuia, SDO (S) Serchhip chuan thusawiin Sports & Youth Services Department-in hetianga ruahmanna siam nachang an hria hi an fakawm hle a ni a ti a, thisen kan pek hi a mamawhtu damlote tan nunna chhantu pawimawh tak a ni thei a ni, a ti. Thisen pe thinte hi thalai hrisel, dam thate an ni a, thisen pe thei tura hriselna kan nei hi lawm nachang kan hriat a pawimawh a. Khawvel thiamna hmanga siam chhuah theih loh thisen hlu tak, midang tana pek duhna thinlung neitute an fakawm tak zet a ni, a ti bawk. Khuallian chuan he thisen pek runpui hi a hawn hnuah thisen a pe hmasa ber zui nghe nghe a ni.
He hun hman pui tura Aizawl lam atanga lo kal, Pi Lalropari, Sr. Coach, Sports & Youth Services Department pawhin Blood Donation neih a nih chhan a sawifiah a. Sports & Youth Services Department hian Sports discipline hrang hrang leh Youth Services-Scouts & Guides, Adventure, NCC, NSS, NYK, YHAI & Mizoram State Sports Council, etc kaltlangin naupang atang thalai zawk te kawng hrang hrangin kum 30 chuang a lo kaihruai tawh a. Thalaite kaihruaitu Department a nihna ang ngeiin midangte tana malsawmna leh nun chhanna turin thisen pek runpui hi District zawng zawngah ni 6 -8 September, 2017 chhung hian hian buatsaih a ni a ti a. Sports & Youth Services Department aiawhin Serchhip District Sports Committee te hnenah hian infiamna bungrua eng emaw zat a hlan nghal a ni. Pi Lalropari hi Directorate of Sports & Youth Services Department a thawk mi thenkhat ten an rawn tawiawm bawk a ni.
Thisen pek hawnna inkhawm hi Pu Lalremruata Ralte, Chairman Serchhip District Sports Committee chuan a kaihruai a, Serchhip District chhunga Sport Association hrang hrang hruaitute leh memberte an kal tha hle a ni.
