No.4287/2021-2022
Dated Aizawl the 16th March, 2022: Vawiin hian Ministry of Women & Child Development bul tuma sak Serchhip P&E venga hmeichhe baihvaite tlukluh lailawkna in, Sakhi - One Stop Centre chu Pi Nazuk Kumar, IAS, Deputy Commissioner, Serchhip chuan a hawng.

Pi Nazuk Kumar chuan, Serchhipin One Stop Centre Building thar tha tak mai a nei chu lawmawm a tih thusawiin, hmeichhia harsatna neite tan a hluin a tangkai hle dawn a ni, a ti a. A building sak pawh a felfai hlea a hriat thu leh sum sen ral ngaihtuaha building tha tawk tak nia a ngaih thu tarlangin, thawktuten duat taka lo enkawl zui zel tur leh tangkai taka hmang zui ngei turin a chah a ni. Hmeichhiaten vantlangah te, mahni inchhungah ngei pawh hleihlenna kan tawk palh theia, chhantu nei lovin chung harsatna leh hrehawmna te chuan min delh bet tlat thei a ni. Chutiang ang harsatna tawkten he Centre hi pan nachang hria ila, min tanpui tur leh a tul anga dan anga min humhim turin an inpeih reng a ni tih i hrereng ang u, mahni ngei kan tlanlut thei lo anih pawhin Phone hmanga biakpawh mai tur a ni a, rilru lama harsatna kan tawhte thlengin min enkawl thei a ni, a ti. Pi Nazuk Kumar chuan, hetiang Centre hlu leh tha kan nei hi mitinin kan hriat a tul hle a, Centre thawktute, media mite leh khawtlang hruaitute chu hmeichhia harsatna tawkte tan hetiang Centre tha tak hi Serchhipah a awm a ni tih zau zawkin i puang zel ang u tiin a chah bawk.

Khualzahawm Pi Lallianpuii, Director, Women & Child Development pawhin thusawiin Serchhipa One Stop Centre building hawn a ni ta chu lawmawm a tih thusawiin, Centre tha tak a awm theih nana thawktute zawng zawng chungah lawmthu a sawi a, ram tha tak sahthlak saktu Land Resources, Soil & Water Conservation Department chungah an lawm hle tih a tarlangin Women & Child Development hmalakna dang hrang hrangte tarlanna a nei bawk.

A hawnna inkhawm hi Pi R. Lalmuankimi, MSS, Nodal Officer, One Stop Centre chuan a kaihruai a, Pu David Zodingliana, AE, DRDA chuan technical report a pe a, Pi Teressa Lalhruaitluangi, case worker chuan Centre chungchang sawifiahna neiin Pu Lalmuansanga Ralte, Addl. DC chuan lawmthu sawina hun a hmang a ni.

One Stop Centre hi hmeichhia, tupawh hleilenna tuar, nupa kara harsatna nei emaw mahnia harsatna sukiang zo lote tana pan theih a ni a. Ni 5 leh zan 5 thlenga lo mikhual lailawk theihna a nih bakah a tul anga dan anga umzui zel pawh an tithei a ni. Serchhip DC office building a room pakhat luahin hun engemawchen kalpui a ni tawh a, tun thlengin case 56 an nei tawh a ni. Vawiina hawn tak Building thar hi April, 2019 khan sak tan niin 2021 April thlaah sak zawh niin, a sak nan hian Rs. 46 lakh vel sen a ni. He building hi thawktute office a nih bakah hmeichhe mangang tlanlutte thlen lailawkna tur leh eiin engkim inrelbawl theihna tura duan a ni a, tunah hian thawktu mi pakuain an enkawl mek a ni.

Serchhip One Stop Centre biak theihna Number hi: 8415049957 / 8974582937/ 9862378955 te an ni.