Vawiin chawhma dar 9:30 khan Superintendent of Police Conference Hall Serchhipah District Child Protection Unit, Social Welfare Department leh Superintendent of Police, Serchhip tangkawp buatsaihin naupang bo leh vakvaite tanpui beihpui thlak – Operation Muskaan III neih a ni.

Khuallian Pu Lalmuanpuia, MPS, Addl. SP Serchhip chuan thusawiin sawrkar hian naupangte hi chhungkuaah tha takin sei lian se, khua leh tui tha tak ni vek se a duh a, chumi atan chuan Operation Muskaan pawh hi buatsaih a ni a ti a. Sawrkarin ram tana tha tura ruahmanna a siam chu tha taka bawhzuitu leh tihlawhtlingtu ni ngei turin kalkhawmte chu a chah a ni.

Operation bultanna hun kahruaitu Pi Lalsiampuii, DCPO chuan Operation neih dan turte leh Juvenile Justice (Care and Protection of Children) Act, 2015 chungchangah zirtirna a pe a. Operation Muskaan hi Ministry of Home Affairs hnuaia Police te leh Social Welfare Department ten naupang bo leh tlanbo te, naupang enkawltu neilo vak rawlai mai mai te, Children’s Home-a awm naupang nu leh pa neilo leh nu leh pa awmna chin hriat lohte zawnchhuah sak leh an let lehna tur chhungkua buatsaih sak leh zawnchhuah sak hi a tum a nih thu a sawi bawk a ni.

Training zawhah hian Bus stand, Auto Rickshaw stand, Hotel hrang hrang, Taxi stand leh Child Care Instructions te thlawhin naupang bo leh vak rawlai an awm em tih an enkual nghal a ni.