2468/2025-2026

Dated Serchhip, the 17^th September, 2025: 8^th Rashtriya Poshan Maah (National Nutrition Month) 2025 chu Vawiin khan Serchhip District-ah pawh hman tan a ni a, Serchhip District-a Anganwadi Centre hrang hrangah Infant and Young Child Feeding (IYCF) chungchang inzirtirna leh Body Mass Index (BMI) Screening neih a ni.

Rashtriya Poshan Maah (National Nutrition Month) hi Serchhip-a District Programme Office, Women & Child Development bakah Serchhip District chhunga ICDS Project te chuan hmangin Serchhip Kawnpui Anganwadi Centre-a hemi puala hun hman ah Mission Shakti DMC Lalvensanga chuan  Rashtriya Poshan Maah hi rampum ah hman tan a nih leh tak thu leh thla thar October ni 16 thlengin kawng hrang hrangah nu leh nausen hriselna kawnga chaw tha ei pawimawhna leh naupang enkawlna kawnga thil pawimawh hrang hrang inzirtirna neia hun hman a nih dawn thu a sawi.

Poshan Abhiyaan Block Coordinator Lalnundiki chuan Rashtriya Poshan Maah pual hian vawiin hian Infant and Young Child Feeding (IYCF) chungchang inzirtirna leh Body Mass Index (BMI) Screening neih a nih thu sawiin, nu, nau pawm ten nausen hnute pek dan dik an hriat a pawimawh thu leh nausen hriselna atan thianghlimna a pawimawh dan te a sawi a. Tunlaia naupang te eitur kan pek tam tak chu an hriselna atana tha lo a nih thu leh Phone kan entir nasa lutuk te chu an tana thalo a nih theih thu a sawi a, hemi kawngah hian nu leh pa te an fimkhur a pawimawh thu a sawi bawk a ni.

Vawiina he hun hman hi Poshan Abhiyaan District Coordinator James Lalremliana chuan kaihruaiin hun hman zawh a nih hnu hian Body Mass Index (BMI) Screening neih chhunzawm nghal a  ni a, hetiang bawk hian Serchhip District chhunga Anganwadi Centre hrang hrangah pawh hun hman a ni bawk.