No.1786/2021-2022

Dated Serchhip, the 11th August, 2021: Vawiin hian Serchhip DC Meeting Hall ah Bawrhsap Pu Kumar Abhishek, IAS hmalaknaa AIR Foundation leh World Vision te atanga Corporate Social Responsibility kaltlanga Covid19 dona hmanrua Serchhip District in a hmuh thahnem tak chu Chief Medical Officer, Superintendent of Police, 4C paruk, VLTF 55 leh Quarantine Facility Caretaker te hnenah hlan a ni.

Chief Medical Officer hnenah hian AIR Foundation atanga hmuh Oxygen Cylinder 30, Regulator 21, Oximeter 30, Nebuliser 15, N95 Mask 500, Thermometer 70, Gloves 700 te, World Vision atanga hmuh Mask 300, Oximeter 50, PPE set 100, Faceshield 200 leh Gloves Pu Kumar Abhishek hian a hlan a. Superintendent of Police hnenah World Vision atanga hmuh N95 Mask 200 leh Surgical Mask 100 a hlan bawk. Tin, Chhuanthar Tlangnuam huam chhunga Community Covid Care Centre (4C) panga awm mekte leh Thenzawl Handloom Complex 4C te hnenah a inzat theuhvin hengte hi a hlan bawk: Oximeter 5, PPE 5, Faceshield 20, Surgical Mask 20, N95 Mask 20 leh Gloves 50. District chhunga VLTF 55 te hnenah Surgical Mask pek an ni a. Tin, District chhunga Quanrantine Facility Centre Caretaker te hnenah PPE kit 5, Surgical Gloves 10, Gloves dang 50 leh N95 Mask 10 theuh pek niin Chhuanthar 4C pangatea hman tur leh Thenzawl Tribal Hostel Facility a hman tur pawisa fai hlan an ni bawk.

Pu Kumar Abhishek chuan, phal taka an mamawh petu AIR Foundation leh World Vision te chungah lawmthu a sawi a, Covid19 hripui dona hna rim taka thawktute zawng zawng chungah lawmthu sawiin an thawhrimna zarah Serchhip District chu vawiin thlengin dinhmun tha takah a ding mek a ni, a ti. Hetianga dinhmun tha taka kan din zel theih nan mipuite chu thuawih zel turin ka ngen a, a hmatawnga thawktute zawng zawng pawh tha thlah lo turin ka ngen cheu a, mamawh leh harsatna in neihte rawn sawi zel ula, theihtawp chhuahin kan tang tlang zel dawn a ni. Heng vawiina CSR kan hmuh te, a hma deuhva kan hmuh tawh zawng zawngte pawh kha thawktute tihchak nana kan theih tawka kan lo tan ve na a ni a, a tul angin kan la chhunzawm zel dawn a ni, a ti.

Dr. Laldawngliana Sailo, CMO pawhin thusawiin, Serchhip Bawrhsap Pu Kumar Abhishek-a’n hripui dona kawnga a thawhrimna te, thawktute a tanpui nasat ziate leh rilru a sen nasat ziate chu fak tlak a nih thu a sawi a. District Bawrhsap fel leh inpezo tak kan neih avangin thawktu zawng zawngte kan phura, vawiin thlengin dinhmun tha tawk takah kan din theih phah a ni, a ti.

CSR inhlanna hi Pu Lalmuansanga Ralte, Addl. DC in a kaihruaia, Pu Amol Srivastava, IAS, SDO, Thenzawl, Pu Vanlalnghenga, Addl. SP te Health Department atangin Dr. ZD Lalmuanawma, DMS leh thawktu dangte, Pu Vanlalnghenga, Addl. SP te, official pawimawh dang leh media mite an tel a ni.

Attachment

  • Loading attachment...