894/2023-2024

Dated Serchhip, the 23rd June, 2023: Vawiin khan Dr. Vanlaltanpuia, MLA, Chairman, Mizoram Youth Commission chuan Serchhip Darnam Venga SEDP sum cheng nuaih zathum senga sak Youth Centre a hawng.

A hawnna inkhawmah hian Dr. Vanlaltanpuia chuan, Mizote hi theihna sang tak nei hnam kan ni a, tih tak zeta kan beihna lam kawng apiangah sang tak kan thleng thei zel a ni. Amaherawh chu India ram sawrkar hna lian lakna UPSC Exam lamah erawh kan dinhmun hi a la hniam tlat mai a, kawng danga tha em em thalaite he kawnga kan hnufual tlat mai hian rilru a tihrehawm em em mai a ni. He mutan hi hneh tumin MYC chuan hma kan la ta a, sawrkarin sum min pe a, hripui karah zirlai beisei awm engemawzat Delhi ah kan tir thla a, mahse thla nga emaw chauh an zu kal thei a. Tichuan nikum khan zirlai 40 te kan tir thla leh a, hei kan hriat angin MYC hnuaia zirlai pangaten UPSC Prelims tun hnaiah an han paltlang thei ta hial a, mizo thalai tling zawng zawng phei chu kan awm ta nual a, kan lawm hle. Kan beisei thil, kan thlen tum hmun hi kan hnaih hret hret zel a ni. Tunah hian kan thalai tam tak IAS nih tum ruh tlat kan ngah tawh hle a, kawng dik kan zawh chhoh zel bawk avangin engtikah emaw chuan kan la tling chur chur dawn niin ka hmu a ni. Kuminah ngei pawh hian Super IAS 2023 buatsaih leh tumin MYC chuan hma kan la mek a, a zat bituk lawk lovin theihna nei nia kan hriatte chu an zaa Delhi a Coaching kaltir kan tum dawn a ni. Zirna lamah chauh nilovin eizawnna kawng dang dapa, thalaite tuaihriam zel hi MYC hian a tum tlat a, chumi atan chuan Youth Centre hi kan mamawh avangin Serchhipah ngei pawh vawiinah kan hawng a ni a, thalaiten thiamna leh hriatna an hmuhna hmun pawimawh ah chantir kan tum dawn a ni, tiin Youth Centre thar hman an tum dan pawh a tarlang a ni. Dr. Vanlaltanpuia chuan, kan Nurse te pawh Foreign lama hnathawhna tur kan dap sak a, thenkhat kan tir chhuak tawh a. Midang tam zawk ten hetiang hna hi an hmuh zel theih nan hma kan la chho zel bawk a, MYC kaihhruaina hnuaiah hian thalai 70 ten sipai an tling tawh a, thalai 142 ten sawrkarah hna an hmu tawh a, mi 38 ten bank lamah hna thawk tawhin thalai 40 chuang ten hmun dangah hna tha tak tak an thawk tawh bawk a ni, tiin MYC hmalakna hnuaia hlawhtlinna te a tarlang bawk. MYC in hna zawngtu thalaiten hnaruak awmna an hriat zung zung theihna tura Mizo thalai Software thiamte hmanga a siam “Hna Inpui” chu NEC lamin tha an tih em avangin Northeast India state zawng zawng huapa hman tur siam turin min ngen a, tunah hian kan buaipui mek a ni, a ti bawk.

He hunah hian Pi Doris Zothanchhungi, Superintendent, MYC chuan technical report a pe a. A building hi chhawng thuma sang niin a chhuat zawng zawng zau zawng (total floor area) hi 1078.27 sqmtr a ni. A chhungah hian ground floor ah lirthei dahna hmun zau tha tak leh Chowkidar room a awm a, first floor ah mikhual thlenna hmun tur mipa leh hmeichhe room hran khum sawm ve ve awm theihna te, office te, leh meeting room, knowledge centre atana la hman chhoh tura duan te a awm a, second floor ah hian Main Hall (Volleyball Court ni nghal) leh store room te a awm a ni. He building hian ruahtui khawlna tur litre singhnih leng tuizem a nei bawk.

A hawnna inkhawm hi Pu H. Lalnunzuala, Secretary, Mizoram Youth Commission in a kaihruai a, Pu James Lalnithanga, MCS, Addl. DC chuan a hawnnaa kalkhawm te lawmna thusawiin, Youth Centre thar chu Serchhip thalaite tan a tangkai hle dawn nia a hriat thu a tarlang.

A hawnna inkhawmah Serchhipa sawrkar mi pawimawhte leh sawm bik mi thahnem tak an tel a ni.