No.3386/2021-2022
Aizawl the 14th, December 2021: Vawiin khan Serchhip District chhunga COVID Appropriate Behaviours (CAB) zawm chungchang leh Krismas leh kumthar inbuatsaihna chungchang sawiho in Serchhip DC Meeting Hall-ah Serchhip District-a Incident Commander, Serchhip Town-a VLTF leh Kohhran hrang hrang aiawhte chu Pu Kumar Abhishek, IAS, District Bawrhsap leh Chairman, District Disaster Management Authority ho in an thukhawm.

Pu Kumar Abhishek IAS chuan Serchhip District-ah COVID-19 hri kai an pun zel thu leh tunah hian District hrang hrang zingah hri kai enkawl lai tam lamah pahnihna kan nih mek thu a sawi a, thla hmasa tawplam atangin hri kai hmuhchhuah hi an tam thu leh kan hma lawkah hunpui, Krismas leh kumthar lawmna lo thleng tur a awm bawk si avangin he hunpui-ah hian COVID-19 kai thar an pun lohna tura hmalak a tul thu a sawi a. Hemi kawngah hian VLTF te leh Kohhran te nen hmalak ho dan tur ngaihtuahin he Meeting hi koh a nih thu a sawifiah hmasa a ni.

Mipui ten tha taka COVID Appropriate Behaviours (CAB) an zawm theihna tura hmalak dan tur sawiho zui niin Police leh Executive Duty te chu he hunpui chhung hian an duty tur thu sawi a ni a, Village Level Task Force (VLTF) te pawh an huam chhung theuhah January thla chawlhkar khatna thleng duty nise an ti a, hmun lun lai Bazar leh veng hrang hrangah mipui ten hri laka invenna an ngaih pawimawh theihnan aurinna hmanga inzirtirna kalpui a tul thu pawh sawi lan a ni.

Krismas leh kumthar lawmna ruai siam chungchang pawh sawiho niin he huna tel Kohhran hrang hrang aiawhte chuan ruahmanna an siam dan te an sawi hlawm a, kohhran tam tak chuan ruai theh tuma ruahmanna an siam thu leh sawrkarin inkaihhruaina a siam a nih erawh an zawm theih tur thu an tarlang tel hlawm a. Ngaihdan hrang hrangte an sawi hnuah DC Office lamin ruaitheh chungchanga ngenna (advisory) hi Kohhran hrang hrangte hnenah lo siam se tia dah a ni.

He Meetingah hian Pi Lalrinchhani Ralte, MCS, EO, Incident Commander, Pi F. Lalnisai, MCS, SDC leh kohhran hrang hrang aiawhte, VLTF aiawhte an tel ani.