3819/2022-2023

Dated Serchhip, the 13th March, 2023: Vawiin khan Superintendent of Police, Serchhip District buatsaihin district chhunga Police Station hrang hrang- Serchhip PS, N. Vanlaiphai PS leh Thenzawl PS a Officer leh thawktu te tan ni hnih chhung awh tur In-Sercvice Training chu neih tan a ni.

Hun bul tannaah Pu Stephen Lalrinawma, MPS, Superintendent of Police, Serchhip chuan inlawmna thu a sawi a, tumah dan chunga leng kan awm lova, dan lekkawhtu Police te ngei pawh dan bawhchhia an awm chuan man theih kan ni. Kan hnathawhna ah kan thawh chhan mipui tana kan tangkai lehzuala kan thawh theih nan training hi thla thum danah kan buatsaih thin a, tun tum training hi tun sawrkar kuma a hnuhnung ber a ni ang, a ti a. Training turte hlawk tak hun hmang turin duhsakna a hlan a ni.

Hun bul tannaah Resource Person Pu K. Saitluanga, MIS, Deputy Director I&PR chuan ‘NGOs/Media, their co-operation with Police’ tih thupui hmangin zirtirna a pe a, tunlaiah media a thang nasa em em a, Print leh Electronic Media tia kan lo sawi thinte bakah New media huang; social media platform tam tak mitin hman theih kan nei ta a, heng hmanraw chi hrang hrangte hi tangkai taka hman thiam a tul hle. Mipuiten kan hnathawhte min hriatsaka, min tanpuia, min pawmpui theih nan kan Media te kan hmang uarin kan hmang tangkai thiam tur a ni a. Khua leh tuite hnena an tana kan hnathawhte hrilh hriat hi mahni infakna anga ngaih tlat tur a ni lova, khawtlang leh ram muanawm zawk a awm theihnana kan thawhho zelnaah a tangkaiin, inrintawnna te min siam sak tel zawk a ni. Mipui nena insuihzawmna tha siam hi kan hna pawn lam thil ni lovin kan hna peng pawimawh pakhat a ni a, chuvang chuan mipuite aiawhtu kan NGO hrang hrang hruaitute nena inpawhna tha buatsaih thiamte, Media hmanga mipuite hnena kan hnathawh hrilhhriatte, mipuite hriattur dan inzirtir lam uar te a tul em em a ni, tiin NGO leh Media te nena inpawhna tha a awm tulna leh hmalak dan turte a tarlang a ni.

He Trainingah hian thupui hrang hrang hmangin Resource Person hrang hrang-

Rev. Rolungmuana Zadeng, Councillor, FG&CC Serchhip, Pi Tlangdangi Sailo, SI(M), Pu Jessie Zaithanmawia, I/C Traffic, Pu Kaste Romalsawma, SDPO, Pu Lalhruaitluanga, ASI(M) bakah Pu Lalmuansanga Ralte, MCS, Addl DC ten zirtirna an pe chhunzawm dawn a ni.