Vawiin hian Serchhip DC Conference Hall ah ram chhung hmun dangte rualin Swachh Bharat Day, 2018 hman a ni a. Bawrhsap Pi Sangchhin Chinzah chu Khuallian a ni.

He hun Er. F. Sanglura, Sr. EE, PHE Serchhip kaihhruaiah khuallian chuan Serchhip leh Serchhip District chhung khuate hmuh theiha faina lama a thang chu lawmawm a tih thu sawiin, faina lawmman dawngtu, a rah sengtu dik tak chu a chhunga cheng mipuite kan nih avangin, a man pek tur a lo tam deuh a nih pawhin pek inhuam a tul thu a sawi a. Thingtlang lama Swachh Bharat Missions hmalakna hrang hrangte chu fakawm a tih thu sawiin, hmasawn zel turin duhsakna a hlan a ni. Pi Sangchhin Chinzah hian Serchhip District chhungah Solid & Liquid Waste Management khaw pariata thawh zawh tawh a nih thute, khaw dang 25 ah kalpui tura hmalak mek a nih thute, Bawlhhlawh bawm khaw 30 a dah vek a nih tawh thute pawh tarlangin Swachh Kosh hmanga tanpuina dawn pawh 90% thawh zawh tawh a nih thu a tarlang a. Serchhip District chu District fai ber nih tuma beih mek a nih thute pawh a tarlang a ni.

He hunah hian Swachhagrahi, Serchhip District aiawha Bihar state a zu kal pahnih Pu Zatluanga leh Pi Zodinthari ten an zin chanchin report an pe a. Pu Samuel Lallawmzuala, District Co-ordinator, Swachh Bharat Missions Gramin chuan Swachh Bharat hmalakna hlawhtlinna (Success Story) kal khawmte hmaah sawina (presentation) a nei bawk a ni.

Tunah hian Serchhip District chhunga Swachh Bharat Missions hmalakna hrang hrangte a hmuna en turin sawrkar laipui atangin Pu Laltlana Chhangte, Deputy Secretary leh Pu S. Kipgen, Under Secretary te Serchhip District ah an awm mek a. An ni pawh hian vawiina Swachh Bharat Day hi an hman pui nghe nghe a ni.

He hunah hian khawtlang hruaitute, zirlai naupangte, chanchinbumite leh sawm bik mi pawimawh engemawzat an tel ani.