2654/2022-2023
Dated Serchhip, the 14th November, 2022: Vawiin khan Serchhip DIET Conference Hall ah Up- Scaling of Aapda Mitra Scheme Training batch pahnihna hawnna inkhawm buatsaih a ni a, Serchhip Bawrhsap Pi Nazuk Kumar, IAS, in a hawng.

A hawnna inkhawm Dr. Lalrokima, Chenkual, DD, DM&R kaihhruaiah khuallian Pi Nazuk Kumar chuan, ram changkang leh hmasawn tawh zawk ten chhiatna lian tham an tawh changin thihna emaw hloh nasa lutuk lo nen an paltlang fo mai a. Engvanga chutiang chu ni thei thin nge kan tih chuan an lo inbuatsaih lawk thin vang a ni thin. An tih ang leh nih ang nih theih ve tumin India sawrkar chuan ruahmanna siamin, training tha buatsaihin hma a la chho mek a. Serchhipah ngei pawh vawiinah kan kalpui mek ni ta a ni. Vawiina lokal khawm Serchhip district thalai mahnia inpe (Volunteer) te hi Serchhip district in chhiatrupna a tawh palh nia mipuite chhanchhuaktu tur in ni ta a. In pawimawhzia leh in thil zir tur tangkaizia hrerenga theihtawp chhuaha lo inzir ngei turin ka ngen cheu a ni, a ti. Chhiatrupna lo thleng palh thei laka inbuatsaihna hi a lo thlen hma hun ralmuanga tha taka kan neih a tul a ni tih hrereng ang u, a ti bawk. Tun hnai chhovah Myanmar nena kan inrina hmun engemawzatah lirnghing vawi tam tak a thleng tawh a, nasa zawk leh lian zawka lo thleng thut thei reng a ni tih hi a chiang viau a ni. Lirnghing nasa vak lova kan ngaih pawhin leimin nasa tak a siam thei bawk a, kan theihtawpa lo inbuatsaih lawk hi chung ang thil lo thleng thut thei laka kan inralrinna tha ber a ni, a ti. Khuallian hian training pe tura rawn kal DM&R thawktute chungah lawmthu a sawi bawk.

A hawnna inkhawmah hian Pu Benjamin Lalzama, Director, DM & R pawhin thusawiin, training chhunga an tihtur tlangpuite a tarlang a. An thil zir chu a pawimawh em avangin khawng deuh takin training an kalpui tur thu a hrilh a. Ni 12 chhung chhanchhuahna hna thawh dan chi hrang hrang an zir dawn a, chhiatna a lo thlen palh a mipuite chhanchhuah hna thawktu tura inpe an nih inhre renga taima taka a tawp thlenga zir ngei tura chahin duhsakna a hlan a ni.

Pu Lalrinawma Traite, Jt. Director, Operation, DM&R chuan Aapda Mitra chanchin tlangpui sawi hmasain, Aapda Mitra chu National Disaster Management Authority ruahmanna anga chhiatrupna lo thleng palha chhanchhuahna hna thawk hmasa tute tana inbuatsaihna leh inzirtirna a ni a. India ramah training buatsaih nan district 250 an thlang chhuaka, chung zingah chuan Mizorama district 5 te telin, training hi kalpui chhoh mek a ni. A thawhkhatna Training hi Aizawl lamah buatsaih tawh niin, district hrang hrangah training hi buatsaih zui a ni a. tun tumah hian a thawh hnihna atan mi 50 ten hapta hnih chhung an training leh dawn a, a thawhkhatna hi September thla khan Aizawlah mi 50 ten training an lo zu nei tawh a ni.

Tun tum a thawh hnihnaa training te hi Serchhip district chhung khaw hrang hrang 21 atanga inpe mi 50 te an ni a. Hapta hnih chhung riahchilhin an inzir dawn a ni.