Vawiin hian CMO Conference Hall Serchhipah World TB Day hman a ni a, Pi Sangchhin Chinzah, District Bawrhsap chuan khuallian niin a hman pui.

Khuallian chuan Serchhip District-ah hriselna lama thawktu fel leh inpe tak tak kan nei chu lawmawm a tih thu a sawi a. Doctorte leh thawktu dangten tih tak zeta hriselna lama hma kan sawnna tur an ngaihtuah thin chu a fak a ni. World TB Day hmannaa kal khawmte chu an tu leh fate leh thenawm khawvengte hnenah TB natna laka inven dan te, inkaichhawn theih natna a nih dan te zirtir a, kan him tlanna tura mahni zawna lo thawk zui zel turin a ngen a ni.

Dr. Laldawngliana Sailo, CMO Serchhip chuan hman laia natna tihbaiawm tak nia kan sawi thin TB natna kha tunah chuan tihdam theih a lo ni tawh a, inkaichhawn theih natna ni mahse hmanlaia kan tihbai ang em em kha chu a lo ni ta lova. A natna hi kan kai atanga a lan chhuah hun sawi mai theih a ni lova, Taksaah engmah thawk lovin rei tak a lo awm thei bawk a. Inrinhlelhna nei chuan District TB Centre pan vat a tha ber a ni, tiin TB chungchang sawifiahna a nei a ni.

Dr. ZD Lalmuanzova, DMS pawhin thu sawiin mi tam tak nunna lo suat tawhtu TB natnaah kan inringhlel emaw, midang te pawh vei ni a kan rin chuan Serchhip damdawiina TB enkawlna hmun kan neihah kal vat thin turin mipuite a ngen a. Inenkawlna man engmah chawi a ngai lovin sawrkarin a thlawna a enkawlna thin thu a sawi a ni.

Pu Sailoliana Sailo, STS hnen atangin kum 5 chhunga Serchhip District TB dinhmun report ngaihthlak a ni bawk a. Kum 2015 ah TB vei mi 71 hmuhchhuah niin mi 1 a boral a, enkawlna damdawi ei zo ta lo mi 2 awmin mi 58 in an dampui a. Kum 2018 ah chuan TB vei mi 49 hmuhchhuah an ni a, 3 an boral a, mi 33 in an dampui a. Kum 2019 kum tir atanga tun thlengin mi 12 hmuhchhuah tawh niin boral an awm lova, an zavaiin damdawi an la ei chhunzawm mek hlawm a ni.

He hun hi Dr. Lalhlunpuii’n a kaihruai a, Serchhip District ah TB natna vei kum tela an tlakhniam zel thu sawiin kum 2025 ah chuan Serchhip District atanga TB natna hi umbo tum a nih thu a sawi bawk.