Department of Information and Public Relations leh Mizoram Film Forum ten Skills Development Training on Videography,  thla khat chhung zirna an kalpui chu vawiin chawhma dar 11:00 khan I&PR Auditorium ah a kharna hun hmangin trainee-te hnenah certificate sem a ni.

He Videography training hi Feb ni 15 - 30 March, chhung khan Center panga-ah kalpui a ni a. Mipa 15 leh hmeichhia 5, an vaiin mi 20 niin an zingah hian Naga pakhat a tel bawk.

Training hi a thlawna kalpui niin, trainee-ten stipend an dawng theuh a, an chhun thingpui man pawh tumsak vek an ni a.

Kharna inkhawm hun tawite neih hi Mizoram Film Forum Chairman Pu Lalawmpuia Khiangte chuan kaihruaiin, Pi Lallianpuii, MIS, Jt Director, I&PR Dept leh State Nodal Officer ,Visual Arts Development chuan thusawiin ‘Film lama hmasawnna thleng mek hian Mizoram pel rawk khawpin Zofate min phochhuak mek a.

Hetianga technical lama thiamna zirna hun tha kan nei thei hi Mizo Film Industry innghahna pawimawh tak anih dawn avangin in thiamna nen hmalam pan sauh sauh ula. Sawrkar in in tan kawng zawnpui che u a inpeih reng a, I&PR Minister zahawm tak phei chuan nasa taka hma in sawnna tur hi a vei em em a. In hmalaknate pawh a thlir reng a. Hmalak sak zel chakawm in awm ang che u. In kutchhuak hi Zofate mai ni lovin khawvel hian a nghak reng a ni’ a ti.

MFF Chairman chuan ‘ Pangchang tak leh ngenngawl taka an hnena kan thlen te min ngaihtuahsak thintu officer kan neih te avang hian kan lawm a. Film Industry hmasawnna hian employment generation a ken tel tlat avangin MFF chuan film siamchhuah kawngah ngawrh takin hma a la zel dawn a ni’ a ti a.

Trainee-te hnenah certificate sem a niin Pi K.Vanlalsangi,MIS, Dy Director ,I&PR Dept pawhin he hun hi hmanpuiin certificate hi a sem ve bawk a ni.