1404/2023-2024

Aizawl, 07.08.2023: Sericulture Minister Er. Lalrinawma hovin vawiin khan National Handloom Day 2023 chu NIC Video Conference Room-ah hman a ni a. Sawrkar laipuia Ministry of Textiles in ruahmanna a siam anga he National Handloom Day hi ram puma hman niin, Aizawlah chuan Weavers Service Centre, Ministry of Textiles chuan programme hi a buatsaih a ni.

Minister Er. Lalrinawma chuan thu sawiin, August ni 7, 1905 a ‘Swadeshi Movement’ kalpui tan hriatreng nan National Handloom Day buatsaih a ni chu thil pawimawh tak ni a a hriat thu a sawi a. Mahni kutchhuak ngei hmanga, ram pawn lama innghat lova intodelh tumna rilru chu hnam humhimna pawimawh tak a nih thu a sawi. Sericulture Minister chuan handloom tihhmawsawn chu pawimawh a tih thu sawiin, culture humhimna a nih tel dan leh, mi tam tak tan eizawnna tha a nih thu a sawi a. Mizoram ah leh hmarchhak state dangah te heng kan handloom kutchhuak hi demand a tha a, a lo sang belh zel nan pawh hmalak zel tul a tih thu a sawi.

Vawiin programme hi Dr. P. Vasu, Dy. Director, Weavers Service Centre, Ministry of Textiles chuan kalkhawmte lawmna thu a sawi a. Commerce & Industries Dy. Director Pi Hunthianghlimi chuan thu a sawi bawkin, Prof. Rama Ramaswamy, Dept. of Commerce, Mizoram University pawhin handloom leh handicraft thiamna humhim zel a pawimawhzia a sawi. NHDC Manager Pu Lalvensanga chuan Yarn Pass Book hmanga puantahtu te’n kum tin man tlawm zawka la an lei theih dan tur te a sawifiah a. Minister hian Yarn Pass Book leh Lighting unit a sem a. Sericulture Department hmalaknaa la rawng thlak zirna Samarth training kalte hnenah certificate hlan a ni bawk. Chawhnu lamah sawrkar hmalakna inhrilhhriatna leh quiz leh design competition te neih a ni bawk.

National Handloom Day hi kum 2015 atang khan hman tan niin, kumin hi a vawi 9-na a ni a. A lawmna pui ber chu Pragati Maidan, Delhi ah Prime Minister Pu Narendra Modi hova hman niin, hemi ni puala Prime Minister thuchah chu India ram hmun hrang hrang atangin NIC Centre-ah weaver te’n an lo ngaithla hlawm a ni.