386/2023-2024

Dated Serchhip, the 10th May, 2023: Vawiin khan Er. Lalrinawma, Minister Sericulture etc., chuan Chawilung leh Baktawng khuaa Sericulture Department hmalakna leh hmalak mekte a hmunah kalin a en a. Chumi hnuah a bial chhung hmasawnna hnathawhte enin hun a hmang bawk.

Er. Lalrinawma chuan, kan ram leh hnam a lo ngheh deuh deuh theih nan eizawnna kawngah hma kan sawn zel a tul hle a, kan intodelh loh chuan kan zahawmna pawhin a tuar thei a ni, a ti a. Pangang khawi hi khawvel hmun dangah leh India ram chhungah ngei pawh market a tha a, kan dinhmun chawikanna atan leh intodelhna atan rinthlak hle a ni. Mizoramah eizawnna atana hmangtu kan tam chhoh zel a beisei awm hle, department pawhin theihtawp chhuahin hma a la zel a ni, a ti. Khawvel sik leh sa enin ramngaw leh tuihnate tichereu lutuk lova eizawnna kan thlan thiam a tul zel a, chumi atan chuan Sericulture lam hi a tha hle a ni, tih tak takna nena beitute tan chuan hlawhtlinna a awm zel ang, a ti bawk. Pangang khawituten hma an sawn zel theih nana Department inpekna chu fakin mipuite tana kan rawngbawlnain rah tha chhuahin hmasawmna hmel hmuh belh zel theih nan a tul anga inpui tawna, farmer te nena inpawhna tha tak nei zel turin duh sakna a hlan a ni.

Chawilung khuaah hian Self Help Group anga hmalak niin chhungkaw 25 in pangang khawi hi bul an tan tawh a. Baktawngah hian chhungkaw 24 in kumin hian bul an tan thar ve dawn a ni. Vawiin vek hian departmenta thawk tuten an hriat duhte hrilh hriatna neiin, a hmunah inzirtirna an nei nghal a ni.

Minister hi Pu V.Zothansanga, Director, Sericulture, Dr. Lalthlamuana Pachuau, Sericulture Scientist, Pu B. Lalchhuana, Deputy Director, Sericulture Department, Pi Lalmuansangi, District Sericulture Officer, Aizawl District, Pi C. Lallawmzuali, District Sericulture Officer, Serchhip District, Pi Remlalliani Zadeng, Sericulture Extension Officer, Serchhip District leh khawtlang hruaituten an tawiawm a ni.

Hemi hnu hian Er. Lalrinawma hian Khawbel khelmual laih mek a en nghal bawk.