1889/2023-2024

2023 Mimkut thla ni 14: Vawiin khan Kolasib District-a Serkhan Health & Wellness Centre chu Tuirial Bialtu MLA, Commerce & Industrial Development Board Vice Chairman Pu K. Laldawngliana'n a hawng.

Pu K. Laldawngliana chuan hriselna pawimawhzia sawiin, hriselna kawnga mipuite'n hma an sawn theih nana Serkhan khuaa sawrkar thuneitute'n Health & Wellness Centre an dah chu lawmawm a tih thu a sawi a. Khawtlang mipuite'n ṭangkai taka an hman theih nan duhsakna hlanin, uluk leh dimdawih taka enkawl zui tur leh thawktute pawh duat thiam turin khawtlang mipuite chu a chah a ni.

Health & Wellness Centre hawnna inkhawm hi Kolasib District Sr Chief Medical Officer Dr RK Lalthlamuana'n a kaihruai a. Pu Lalchhuanawma hnen aṭangin HWC sak dan report ngaihthlak a ni a. Serkhan Village Council, YMA leh MHIP ai awh leh khawtlang mipuite aṭangin thu sawi ngaihthlak a ni a. Lungdai PHC-a Medical Officer Dr Roluahpuii Chawngthu chuan lawm thu sawiin hun a khar a ni.

He hunah hian Health & Family Welfare Department-a thawkte, Serkhan khawtlang hruaitu leh tlawmngai pawl ai awhte, political party hruaitute leh khawtlang mipuite an kal khawm a ni.