Vawiin chawhma dar 10:30AM khan District Health Programme leh Mara Chano Py ( M.CH.P) te tangkawpin “ Psychological and Mental Health First Aids for All” tih thupui a hmangin, Observance of World Mental Health Day Programme an buatsaih a. He Programme hi Dr. V.Daochai, M.O.( Mental Health) in a kaihruaia, Pi Harleen Kaur IAS, District Bawrhsap chu khuallian niin, Pu N.Zakhai, EM (Edu), MADC chu khualzahawm a ni.

Khuallian Pi Harleen-i chuan Mental Health ( Rilru Hriselna) hi thil pawimawh tak ni si, kan ngaihthah fo thin a ni a, khawtlangin tihtak zeta kan buaipuia kan ngaihven a hun tawh tak zet a ni. Rilru a hrisel phawt lo chuan hmasawnna leh changkanna tluantling hi engtikah mah kan nei theih ngai lovang. Chanchintharah zirlai Naupang kum naupang tak tak te, an result a chhiat/fail emaw avang mai mai a, an intihhlum thu chhiar tur awm chamchi te hi, Zirlai naupang te hlawhchhamna ni lovin, keini nu leh pa leh a khawtlang anga Mental Health lama kan hlawhchhamzia pholangtu langsar tak a ni, a ti.

Vawiin Programme hi Session 2 a then a ni a, Session 1-na ah Khuallianin thu a sawi bakah, Pi Ango Chhachai , PSW in Siaha District Health Programme ten 2014, November atanga 2016, September chhunga an hmalak dan te Power Point Presentation hmangin a entir a. Resource Person Prof.Dr HK. Laldinpuii Fente, Dept. of Psychology, Mizoram University in “Mental Health” leh PFA( Psychological First Aid) chungchangah Power Point hmangin zirtirna a nei a ni.

Session hnihna-ah hian Gov’t Siaha College zirlai ten Skid Show te entirin, Mental Health Day puala Essay inziahsiakna lawmman te sem a ni a. Dr.Lalnunziri SMO in thusawina hun a hman zawha, Pi P.Chaki, President, M.Ch.P in lawmthu sawina in vawiin programme hi a khar ta a ni.