Vawiin chawhnu dar 4:00Pm khan DC conference Hall-ah District Task Force Committee ten Covid-19 chungchangah Emergency meeting an nei leh a. Meeting hi District Bawrhsap leh Chairman District Task Force Committee ni bawk Pu Bhupesh Chaudhary, IAS chuan a kaihruai a ni.
Vawiin Emergency Meeting-ah hian Emergency meeting hmasa zawk ni 10/3/2020 a thurel bawhzuia Task Force hmalakna hrang hrang te thlirletna neih a ni a. Siaha district a Covid-19 lut loh tura hmalak dan tur te, lo lut palh ta se engtia a darhzauh zel loh nan hma kan lak ang ti te huangzau tak leh chipchiar taka sawiho a ni a. Isolation ward te, Quarantine kalpui dan tur te leh Mipui ti thlabarh lutuk si lova, a tam thei ang bera awareness beihpui thlak dan tur te rel a ni a. Vawiin meeting chuan phaia lehkha Zirlai naupang lo hawte leh ramdang atanga lo haw te lo dawnsawn dan tur pawh chipchiar takin an rel a. Zirlai pawl te chu an zirlaipui lo haw turte lo hriatchhuah kawngah leh self- quarantine tih a tulzia anmahni leh an chhungte hrilhhriat kawngah theitawpa sawrkar tanpui turin meeting chuan a ngen bawk. VC leh tlawmngai pawl te pawhin vengtin information center atanga mipui te hriattur pawimawh puan kawngah chaktaka hma la turin meeting chuan a ngen a, kohhran pawhin a tul ang zela kohhran mipuite fimkhur tura zirtirna kawngah hma la turin meeting chuan a ngen bawk a ni.
