3025/2024-2025

Siaha the 15th November 2024: Ministry of Tribal Affairs, Govt of India hnuaia tribal-te hamthatna leh hmasawnna tura duan scheme thar Dharti Aaba Janjatiya Gram Utkarsh Abhiyan(DAJGUA) hawnna chu vawiin khan DC Mini Conference Hall, Siaha-ah Addl DC Pu Abraham Beirazi Khithie kaihhruaina hnuaiah neih a ni.

Hemi ni puala hun hmanah hian hun kaihruaitu Pu Abraham Beirazi Khithie, chuan hmasawnna rualkhai a awm theih nana tribal-te hmakhua ngaia Scheme tha tak duan chhuah a ni chu lawmawm a tih thu sawiin duan chhan a nih ang taka tribal-te nun chawikangtu a nih a beisei thu a sawi a, scheme thar chu a hlawhtlin ngei theih nan concerned department-te theihtawp chhuah turin a chah bawk.

Siaha District Social Welfare Officer Pi LS Lalbiakzuali chuan scheme nihphung leh kalhmang tlangpui sawihawnna a nei a, DAJGUA scheme tum ber chu tribal community-te dinhmun chawikan a, tribal tamna khaw thlan bikte intodelhna kawnga an dinhmun tihchangtlun a ni, a ti. Development Action Plan for Scheduled Tribes (DAPST) leh State Tribal Sub Plan under allocation, underutilisation leh national expenditure hnuaia sum tam tak haichhuah nan leh hmunhma lama chhungkua leh khawtlanga indaihlohna sutkian nana ruahman a nih thu a sawi bawk. He scheme in a tum ber chu tribal mipuite hmasawnna tura Sawrkar Laipui hnuaia Ministry 17 te leh line department-te convergence hmanga tha taka thawh ho a ni a. Nitin eizawnna kawngahte, zirna emaw khawtlang hriselna leh retheihna umbo chu a tum ber a ni a ti. Tribal-te tihhmasawnna tura scheme hrang hrang awm te thuamchakna tura duan a ni, a ti bawk.

DAJGUA scheme hi Kum 5 chhung (2024-25 to 2028-29) kalpui tura ruahman niin India rama khaw 63,843 chhunga tribal mi vaibelchhe 5 huam tura ruahman a ni a, October Ni 2,2024 khan Mahatma Gandhi piancham denchhanin Prime Minister Shri Narendra Modi chuan Jharkhand ah hawnna a lo nei tawh a ni.

Vawiin DAJGUA Hawnna inkhawmah hian Siaha khawchhunga department hrang hrang aiawhte an kalkhawm a ni.