Tukin zing chawhma dar 7:00Am khan Mizoram hmundang te rualin Siaha-ah pawh  “Tho bô la, Tihnawh tao teh Thingphun la, Tuihna siam rawh” tih thupuia hmangin D.C’s Office Complex-ah Green Mizoram Day-2017 hawnna inkhawm hun hman a ni.  He hunah hian District Bawrhsap leh  District Committee on Green Mizoram Chairman ni bawk Pi Harleen Kaur IAS chuan thusawina hun leh kangmei laka mahni khaw ramngaw vengtha VC te hnenah lawmman semna hun a hmang bawk. 

Tukin Green Mizoram Day 2017 hawnna inkhawm hi Pu Thaly T.Azyu DCF, MADC leh Secretary, Siaha District Committee on Green Mizoram ni bawk chuan a kaihruaia,  Green Mizoram Day kan lo hman tawh china kan hmalak tawhna leh hlawhtlinna te, kumina kan hmalak dan tur leh hmachhawpte report pekna hun a hmang bawk. Pu Thaly chuan nikum Green Mizoram Day pualin Thingtiak 6000 vel phun a nih bakah,  Green Mizoram Pual ni chiah lo pawn Ahmypi leh Khopai khaw inkar kawngpui sirah nikum khan MADC Forest Department chuan Thingtiak 1400 a phun bawk a, nikuma Thingtiak kan phun te hi 100 zela 60 te chu an damchhuak ni, a ti. 

Kumin Green Mizoram Day pual hian Department hrang hrang atanga Thingtiak an phun tur mamawh zat report chu 1905 a ni a, he mi bakah hian Thingtlang lamah Thingtiak 1700 sem chhuah tum a ni, a ti.  Kumin Thingtiak MADC Forest Department in a sem chhuah te hi : Lamkhuang, Thlado, Ngiau, April, Silver Oak, Hmawng, Khuangthli ,Theihai leh kawlthei  te an ni. 

Pi Harleen-i pawhin thusawiin, Kum 1998 atanga Green Mizoram Day hman tan a ni a, Green Mizoram Puala kan thingtiak phun hi nuai 36 lai a ni tawh a, heng kan thingphun te hi 100 zela 81 te chu an dam khawchhuak a ni. Delhi tlang atanga Mizoram lo zin ka mikhual te hnenah chuan Mizoram boruak thinghlim a tam thei ang ber in hip te u; ka ti thin a ni, a ti. Mizoram Sawrkarin Ramngaw humhalh nan tan a la nasa a, mipui te pawhin kan ramngaw pawimawhna te hriain, kan  hlut tawh hle a ni. Rawng hring hian hausakna a entir ang hian Mizoram hi Ramngaw hring dupin kan bawhkhah tir chuan kan tu leh fa te tan hausakna Ro kan hnutchhiah tihna a ni dawn a, kan tu leh fate tan thingtiak phun leh ramngaw humhalhin Ro hlu tak hnutchhiah turin tan i la zual zel ang u, a ti. 

2016-2017 inkara Village Council, mahni ram huam china, kangmei laka ramngaw humhalh tha zual te chu: 

1st- Saikao, VC

2nd-Lohry, VC

3rd- Tisopi, VC 

Heng VC te hian Pakhatna in Chawimawina thuziak leh tangkafai Rs.50,000/-, Pahnihna in Chawimawina thuziak leh tangkafai Rs. 30,000/- leh pathumna in Chawimawina Thuziak leh Tangkafai Rs.20,000/-an dawng a ni. 

Tukin zing Green Mizoram Day 2017 hawnna inkhawm neih zawhah hian Bawrhsap, SDO(S) leh DCF ten DC’s Office Complex-ah Thingtiak an phun nghal a, MADC Forest Department in Department hrang hrang te hnenah thingtiak phun tur an sem nghal a ni.