4159/2025-2026

Dated Siaha, 26th January 2026: Vawiin chawhma dar 10:00AM khan Siaha District Football Association (SDFA) ground, Meisatla-ah India Republic Day vawi 77-na ropui taka lawm a ni a, Pu VL Hruaizela Khiangte, Deputy Commissioner, Siaha chu Khuallian a ni.

Khuallian Pu VL Hruaizela Khiangte chuan Hnam puanzar a pawh pharh rualin parade contingent 19-in hnam puanzar chibai an buk a chhanglet a, Republic day thuchah a sawi chhunzawm nghal a ni.

Pu VL Hruaizela Khiangte chuan India Republic Day vawi 77-na, lawm tura kalkhawmte leh hmun hrang hranga Siaha District mipui zawng zawngte duhsakna chibai a bûk hmasa a. Kum 1950 vawiin angah khan khawvela mipui sawrkar ram lian berte zinga chhiar tel turin Danpui kan nei a; he Danpui hian mi tinte chu zalênna, dikna leh intluk tlànna min pe a, nun nuam taka kan khawsak theihna turte min ruahmansakin, thlamuang leh hahdam taka kan khawsak tlàn dial dial theihna tur kawngte min kawh hmuh bawk a ni, a ti.

Khuallian chuan ‘Vantlang khawsak phung leh kan tuallai nunah pawh ngaihmawh tur thil thenkhat awm ve bawk mah se, hmangaihna leh induhsak tawnna kan la chhawmnung zel a, inthenawm khawvènnaah pawh nunmawi leh duhawm tak kan la lantir reng a ni’ tiin Mizo nunze mawi tak kalsan lo turin kalkhawmte a sawm a ni.

Siahaa Republic day vawi 77-na lawmna hunah hian Armed contingents 2, Unarmed contingents 3 leh School Contingents 14, an vaiin 19 an awm a, Parade commander hi SI Chuman Prasad Ray niin, second parade commander hi Hav. V. Laltlansanga a ni. 20th Battalion Assam Rifles te’n mipui hmuh theih turin hmanrua (weapons show) an neihte an pho chhuak bawk.

Parade contingent-te lawmman lak dan chu:-

Pakhatna – Government Middle School, Siaha
Pahnihna – Lorrain English School, Siaha.
Pathumna – Presbyterian English School, Siaha.
Unarmed winner – NCC Government High School, New Siaha.

Khuallian hian parade contingent lawmman bakah Beti Bachao Beti Padhao (BBBP), ICDS Siaha hnuaia infiamna huanga hmeichhia chethate (girl champion) lawmman a hlan a, Cricket-ah Florence J. Hrophathai, Siahatla, U-19 BCCI Women tournament, Runner up, Brenda Rosepawngia, Siahatla, U15 T-20 Tournament, Runner up, Elena HC Lalbiakengi, Siahatla, U15 T-20 Tournament, Runner up. Boxing-ah Vanlalduatsangi, College Vaih. India Republic Day vawi 77-na puala Mipa leh Hmeichhia Volleyball tournament leh Badminton lawmman a sem bawk.

Siaha Khawpui chhung leh district chhung khuate faina kawnga inelna thianghlim buatsaih lawmman khuallian hian a sem bawk a, lawmman dawngtute chu:-

Khaw fai:
Pakhatna - Tisi,
Pahnihna - Chapi,
Pathumna - New Laty.
(Inelna hi Local Adminstration Department, MADC-in an siam a ni.)

Veng fai:
Pakhatna - New Siaha East I,
Pahnihna - Siahatla I,
Pathumna - Siaha Vaihpi I.
(Inelna hi Siaha Bialtu MLA Dr. K. Beichhua an a siam a ni.)

Vawiin hun hmannaah hian Mizoram Cleanliness Competition 2025 neiha lawmman pakhatna dawngtu chu Siaha district anih thu puan a ni a, a semna hmun Sipai lammual Aizawla neihah Mizoram Larsap Gen (Dr) Vijay Kumar Sing, hnen atangin Pi S. Lalmuanpuii, Sr. LAO, MADC-in a dawng a, certificate leh ₹1,50,000.00 (nuaikhat leh singnga) a kengtel.