No.3040/2021-2022
Aizawl, November ni 18 : Vawiin chawhnu dar 1:00Pm khan DPRC (SIRD&PR) Conference Hall, Meisavaih, Siaha-ah Mizoram Youth Commission, Medhavi Foundation leh Siaha District Skill Core Committee te tangkawpa buatsaih Covid-19 pandemic vanga hmun danga inhlawh lo hawh (Returned Migrant Workers) te tana buatsaih Cake Baking Training kharna hun hman a ni. He hun Pu Abraham Beirazi Khithie,Addl.DC chuan khuallian niin a hmanpui a, Pu N. Lalzarzova SDC, in closing function hi a kaihruai a ni.

Khuallian Pu Abraham chuan chuan thusawina hun hmangin, hetianga Mizoram Youth Commission, Medhavi Foundation leh Siaha district Skill Core committee te tangkawpin in Siaha thalai, hmun danga ei zawnga awm Covid-19 hripui avanga mahni hna kalsan a lo let te hmakhua ngaia training a buatsaih hi lawmawm a ti thu sawiin, Trainees te pawh an training atanga an thiam thil te chhawr tangkaia, tum(goal) chiang tak neia, an hmazawn theuh huaisen taka haikaw turin a chah hlawm.

Pu Lalrokhawma,GM,DIC pawhin thusawina hun hmangin, Trainees te tana sawrkar scheme hrang hrang, ngaihven tur awm leh a kalhmang te leaflet siamin a sem bawk.Pu PP.Zalena,President MTP(H) leh Skill core committee member ni bawk pawhin thusawina hun a hmang bawk.

Cake Baking hi mi 24,Mipa-2 leh hmeichhia-22, kum 21-43 inkar ten ni 10 chhung an training a, trainingah hian Practical Lesson-13 leh Theory lesson-6 an zir a ni. Trainer Pu David Lalruatfela,Chief Trainer(Medhavi Foundation) leh Trainees (group 3) aiawh mi 3 ten thusawina hun hmangin, trainees ten training an hlawkpui thu an sawichhuak hlawm a ni.

Khuallian Pu Abraham Beirazi Khithie chuan Trainees 24 hnenah certificate a hlan hnuah, Pu N. Lalzarzova, SDC, Siaha chuan lawmthu sawina in training kharna inkhawm hi a titawp a ni.

Vawiin closing function-ah hian Trainees te siam Cake tui tak chu Pu Abraham leh Pu Khawma ten zaina hun an hmang bawk.