Vawiin chawhma dar 11:00Am khan DC’s Conference Room-ah, Siaha District chhunga Pawna Inthiar awm tawh lo tura inbuatsaihna leh hmalak zel dan tur ngaihtuahin Official te leh Siaha Town chhunga Village Council Member ten Meeting an neih.
He Meeting-ah hian District bawrhsap,Pi Harleen Kaur IAS, chuan thu sawiin kan zun leh Ek te hi a nihna tur dik taka a awm lo hian bawlhlawh kan tana hlauhawm, heng natna hrik Malaria, Typhoid leh Senten te min thlentu a ni a. In leh lo tha tak tak neih mah ila Inthiarna tha leh thianghlim kan neih silo chuan kan la changkang tawk lo tihna a ni, a ti. Mi thenkhat Inthiarna neih reng si a, pawna inthiar ching an la awm hi sim a hun tawh hle a ni tiin, khawtlang hruaitute chu mipuite zirtirna lama tan la zual sauh sauh turin a chah hlawm bawk a ni.
Siaha District Open Defecation Free (ODF) nih tir tur hian UD&PA Department leh Mara Thyutlia Py (MTP) ten Siaha Town chhungah hma an la a, Rural Area-ah chuan PHED ten hma la ve thungin, kum 2012 atang khan hma an lo la tawh a. Tunah hian Inthiarna 1632 sak zawh tawh niin, sak hmabak 1488 sa leh turin hma an la mek a ni.
