1873/2024-2025

Siaha, the 3rd September 2024: Vawiin chawhma dar 11 khan DC Mini Conference Hall-ah PM Vishwakarma scheme tihhlawhtlin dan tur relin District Implementation Committee (DIC) Siaha thutkhawmna neih a ni.

Pu Abraham Beirazi Khithie, Additional DC, Siaha in thutkhawm hi kaihruaiin Pu H. Lalbiaknia, SDC in report a pe a, PM Vishwakarma hnuaia scheme 18-ah dilna thehluh theih niin Siaha district chhung khaw hrang hrang atangin scheme 15-ah dilna 461 a lut tawh a, dilna lut zawng zawng hi kawng (stage) 3 thleng endikna neih tur a nih angin stage 1na paltlang tawh mi 123 awmin stage 2na paltlang tawh mi 13 leh stage 3na paltlang mi 9 an awm a ni.

PM Vishwakarma hi Sawrkar laipui scheme niin India rama kut themthiam te leh thilsiam thiamte tanpuina leh khaichhuahna atana ruahman a ni.

SCHEME HUAM CHIN: Heng a hnuaia tarlante hi a huam ang:
1) Carpenter (Suthar/Badhai);
2) Boat Maker;
3) Armourer;
4) Blacksmith (Lohar);
5) Hammer and Tool Kit Maker;
6) Locksmith;
7) Goldsmith (Sonar);
8) Potter (Kumhaar);
9) Sculptor (Moortikar, stone carver), Stone breaker;
10) Cobbler (Charmkar)/Shoesmith/Footwear artisan;
11) Mason (Rajmistri);
12) Basket/Mat/Broom Maker/Coir Weaver;
13) Doll & Toy Maker (Traditional);
14) Barber (Naai);
15) Garland maker (Malakaar);
16) Washerman (Dhobi);
17) Tailor (Darzi);
18) Fishing Net Maker.

SCHEME THILTUMTE
(i) Kut themthiamte thiamna hriatpuia, he scheme hnuaia hamthatna awm te hmang thei tura tanpui.
(ii) An thiamnate belhchhaha tunlai khawvel mil tura tanpui leh training pek.
(iii) An theihna leh thilsiam quality belhchhah tura tanpui leh hnathawhna hmanraw changkang zawk ngaihtuah sak.
(iv) Dahkham awm lo leh a punna hniam zawka loan awlsam taka an lak theihna tura tanpui.
(v) Digital transaction an hman tam theihna tura lawmman siamsak.
(vi) An thilsiam chhuahte hralh chhuahna kawnga tanpui.

TANPUINA DIL THEI TE;
(i) He scheme in a thlanchhuah trade 18 hmanga informal emaw self-employment a eizawngte’n an dil thei ang.
(ii) Diltu chu kum 18 tling a ni tur a ni.
(iii)Tunhnai kum 5 chhunga sawrkar scheme dang PMEGP, Mudra, PM Svanidhi loan, etc. lo la tawh tan a dil theih loh a. Amaherawhchu, Mudra leh Svanidhi loan bikah hian, loan rul zo tawhte tan, a loan sanction ni atanga kum 5 a ral tawh chuan a dil theih.
(iv) Chhungkaw pakhat atangin mi pakhat zelin a dil theih. “Chhungkua” tih hian nupui/pasal leh fate nupui pasal la nei lo a huam ang.
(v) Sawrkar hnathawk leh an chhungkaw member te tan a dil theih loh.

INZIAHLUH (REGISTER) THEIH DAN
(i) Common Service Centres (CSCs) kaltlangin emaw mahniin emaw online-in, PM Vishwakarma portal-ah inziahluh tur a ni.
(ii) Diltu chuan Aadhaar Card a neih ngei a ngai a. Aadhaar enfiahna hi CSC ah biometric hmanga neih tur a ni.
(iii) Dilna pawmpui tur hian enfiahna (verification) kawng thum (3) paltlang a ngai a, chumi hnuah chuan PM Vishwakarma scheme hnuaia inziaklut (registered) a ngaih a ni ang.

SCHEME HNUAIA HAMTHATNA AWMTE
(i) PM Vishwakarma Certificate leh ID Card: Kut themthiamte hian PM Vishwakarma Certificate leh PM Vishwakarma ID Card an dawng ang a. Certificate hian diltu chu Scheme hnuaia hamthatna zawng zawng a dawn theih nan a tanpui dawn a ni.
(ii) Skill Upgradation: Thiamna belhchhahna atan kawng thumin hma lak a ni ang:
Skill Assessment – Thiamna enfiahna hi Training Centre ah neih a ni anga, Basic Training tan hmaa neih tur a ni.
Basic Training – Basic Training hi darker 40 vel a ni ang a, ni 5 -7 chhung a ni ang. Training chhung hian chenna, ei leh in a thlawna pek a ni ang. Training zawh hnua Ministry of Skill Development & Entrepreneurship-in certification a pek hnuah DBT mode hmangin ni khat atan stipend Rs. 500 pek a ni ang.

Advanced Training - Basic Training zawh hnua thiamna neih belh duh tan ni 15/darkar 120 emaw a aia rei Advanced Training-ah inziah luh theih a ni a. Ni khat atan stipend Rs. 500 a ni a. Training neih chhung hian chenna, ei leh in pawh a thlawnin sorkarin a pe dawn a ni.
(iii) Hmanraw Leina: Hmanraw leina atan Rs. 15,000/- chu Skill Assessment neih zawhah beneficiary hnenah pek a ni ang. Incentive hi e-RUPI/e-voucher hmangin beneficiary-te hnenah pek chhuah a ni ang a, hei hi hmun ruatsaah hman theih a ni ang.
(iv) Loan a tanpuina: Loan hmanga tanpuina pek theih zawng zawng hi cheng nuai thum a ni a. Loan tranche hmasa ber hi cheng nuai khat leh second loan tranche cheng nuai hnih thleng pek theih a ni.

Beneficiary hian cheng nuai khat thleng dawng thei tur chuan Skill Assessment leh Basic Training a nei tawh tur a ni.

Cheng nuai 2 thleng dawng thei tur chuan first tranche loan tha taka rul zo tawh leh Advanced Training paltlang tawh a ni tur a ni.

Loan punna hi 5% ah fixed a ni a. Chumi aia sang bank in interest rate a tuk anih chuan 8% thleng Sawrkarin a tumsak ang.

Loan hi Scheduled Commercial Banks, Regional Rural Banks, Small Finance Banks, Cooperative Banks, Non-Banking Finance Companies leh Micro Finance Institutions te hnuaiah pekchhuah a ni ang.

(v) Digital Transaction lawmman: He Scheme hian beneficiary-te chu digital transaction an hman theihna turin tih chak a tum a. Digital transaction an neih apiangin Rs. 1 zel pek an ni ang. Thla khatah transaction 100 thleng he mi incentive tan hian pawm a ni dawn. Transaction hian online a pawisa pek leh dawnte a huam ve ve ang.

(vi) Marketing Support: An thil siam chhuahte a quality that zawk nan Quality Certification kalpui tum a ni a, Quality Certification atan a tul angin tanpui an ni ang. Social media leh digital advertising hmanga an thil siam te promote turin branding-te kalpui an ni ang a. E-commerce lama an thil siam te hralh chhuahna tur Open Network for Digital Commerce (ONDC)-te hmel hriattir an ni bawk ang. Market linkage leh trade fair te pawh a tul angin buatsaih tum a ni.

PM Vishwakarma Scheme inkaihhruaina (guidelines) hi www.pmvishwakarma.gov.in website ah chipchiar zawk a en theih a ni a. Hei bakah hian Directorate of Commerce & Industries, Khatla leh District Industries Centre zawng zawngah zawh fiah theih reng a ni.