3410/2024-2025

Siaha the 6th December 2024: Vawiin chawhma dar 11 khan DRDO Conference Hall, Siaha-ah Prime Minister's Employment Generation Programme (PMEGP) awareness campaign neih a ni a, Pu VL. Hruaizela Khiangte, Deputy Commisioner, Siaha chuan khuallian niin hun a hmanpui.

Khuallian Pu VL. Hruaizela Khiangte chuan thusawiin, a mamawhtute tana awareness campaign buatsaih a ni chu lawmawm a tih thu leh kal khawm te’n hlawkna thar an neih ngei theihna atana hun hmang theuh turin a chah a. zawhna an neih ang ang pawh inthlahrung lova zawt turin kalkhawmte a sawm.

Pu VL Hruaizela Khiangte chuan ‘Loan lak tha taka rulh hian midang lo dil lehzel tur tan kawng kan hawnsak a, chutih rualin loan lak ngaihsak lo, nawmsakna thil - silhfen leh bungrua lei nan mai maia kan hmana, kan rul thei lo a nih chuan midangte kawng kan kharsak a ni’ a ti.

PMEGP hnuaiah trade list mumal tak siam a nih thu khuallian chuan sawiin loan lak tur hrechianga, mahni tuina mai bakah district mipui tana tha leh hlawk thlan thiam tur a ni a ti a, hlawhtlinpui tur ngei thlan thiam a tul a ti bawk. Midangin an tuina an thlan fuh atanga hlawkna leh hlawhtlinna an chan avanga chumi line chu thlan ve kher tur tihna a ni lo tih khuallian chuan sawi langin, an hlawhtlinna phenah hian thawhrimna leh thlantui tam tak a luang tih hriat tur a ni a, Loan lak zat inang rau rauah a nachang hria leh taima tan chuan hlawhtlin a awlsam bik a, sawrkar chuan mipuite tana scheme chi hrang hrang a siam atangin ti tak tak turte tan chuan loan pekchhuah a inhuam reng a, sawrkar flagship programme Bana kaih policy nen pawh a theih ang anga kalkawp tir tum a nih thu a sawi bawk.

He hun hi Pu Reuben T. Kompa, Deputy Director, District Labour & Employment Exchange chuan a kaihruai a, Pu Chawngdingliana, Extension Officer, DCIO-Siaha leh Pu Safiyan Hayath, Executive, KVIC, Aizawl te’n PMEGP nihphung kalkhawmte hnenah zirtirna an pe a, Pu Isaac Lalfamkima Sailo, Chief Manager Mizoram Rural Bank, New Siaha chuan bank-a loan lak theih dan kalhmang leh dil theih dan te a sawifiah a. Pu Vanlalnghaka, Meisatla, PMEGP hnuaia Automobile Workshop dintu hnen atangin thusawi ngaithlak a ni bawk.

Vawiin hun hmannah hian bank hrang hrang aiawh, ITI Siaha zirlai, Bana kaih scheme hnuaia dilna thehlutte bakah PMEGP hnuaia loan diltute thahnem tak an kalkhawm a ni.