4044/2023-2024

Dated Siaha 5th March 2024 : Vawiin chawhma dar 11 khan Model Career Centre (MCC) Labour, Employment, Skill Development and Entrepreneurship (LESDE) Department hnuaia sak chu Pu Lalhmunsanga Hnamte, Deputy Commissioner, Siaha chuan a hawng.

Pu Lalhmunsanga Hnamte chuan Siaha mipuite, a bik takin thalaiten tangkai taka an hman turin lawm takin Model Career Centre (MCC) chu a hawng tih a sawi a. LESDE- Director a nih laiin theihtawp a lo chhuah tawh thin thu sawiin, vawiina a amah ngeiin MCC a hawng chu ropui a tih thu a tarlang a. Tunlai thiamna sang zelah lehkha zir mawl tawp a hun tawh lo a, tum mumal leh awmzia nei zawk a zir a hun tawh hle a ti a. Zirlaiten harsatna an neih ang angte leh thalaiten puih an ngaihna a puih theih tur Model Career Centre- Siahaah ngei hawn a ni chu hmasawnna ropui leh tangkai tak a ni, a ti. Career Guidance- pawimawh zia sawiin, Pu Lalhmunsanga Hnamte chuan a bik takin pawl 10 leh pawl 12 zirlaite hnenah phei chuan uar zawka kalpui thin turin Employment Officer leh a thawhpuite a chah nghal bawk.

Pu Lalhmunsanga Hnamte chuan Mizoram Building & Other Construction Workers Welfare Board ( MBOCWWB) - chu tangkai zawka chhawr thiam a tul tawh hle a ti a. MBOCWWB - hnuaiah hian cheng 150 in Enrolmen tih theih niin, hamthatna tam tak Medical Reemburement, Children Education Assistance leh nupui/ pasal neihah te bakah thihna lo thleng hialah pawh hamthatna tamtak a awm a, he Welfare Board hlutna leh tangkaina hi Siaha mipuiten hriatchiang a, bawhzui a hun tawh tak zet a ni, a ti. Tun dinhmunah Siaha district a Enrollment ti an la tlem tih tarlangin Pu Lalhmunsanga Hnamte chuan Siaha mipuite chu MBOCWWB- ah thehnem ngai zawk a in 'register' turin a sawm a ni.

Skill Development leh Entrepreneurship lamah hmalak zel a tul tih tarlangin Pu Lalhmunsanga Hnamte chuan eizawnna tlak leh tling nei turin LESDE hnuaiah thiamna hrang hrang zir theih a nih thu a sawi a. Lehkha zir sang lo leh sawrkar hnathawklo tan thiamthil tam tak pek an nih thin thu tarlangin, mi tam takin eizawnna ngialnghet an nei phah tawh a ni tiin Skill Development leh Entrepreneurship lamah pawh tun aia nasa zawka ke pen a tul hle a ni, a ti.

Pu Reuben Kompa, Employment Officer, LESDE, chuan Model Carrer Centre (MCC) nihphung tlangpui tarlanna a nei a. MCC hian tualchhung thalaite leh hna zawngtu tan an chhehvelah hna a awm tih a enfel thin ang a, hna zawngtu leh hna thawh tur neite inkarah palai hna a thawk thin dawn a ni, a ti a. MCC hnuaiah hian Young Professional (YP) an awm a, Young professional hian College hrang hrangah outreach activities zirlai leh zirtirtute inakarah inpawhtawnna tha awm turin an thawk thin dawn a. Career Center Services leh National Career Service Portal pawimawhna mipuite hnena puanzar bakah registration ah te an puih thin dawn a ni, a ti. Tun dinhmunah Siaha tan Young Professional tur dil mek a nih thu tarlangin, pek an nih hma chuan Young Professional hna hi Employment Officer in a lo thawk dawn a ni, a ti. Zirlaite tan Carrer Guidance - an buatsaih theih bakah hna zawng mek tan an puih theih reng thu a tarlang bawk.

Model Carrer Centre (MCC) hi LESDE Office, New Colony-II, ah a awm a. MCC ah hian Councelling Room leh Activities Room tha tak a awm a ni.