3061/2023-2024

Dated Siaha 15th December 2023: Vawiin khan Siaha DC Pu Lalhmunsanga Hnamte kaihhruainain Christmas leh Kumthar vuakveta venhimna kalpui dan tur sawihona DC Mini Conference Room-ah neih a ni a .Thutkhawmah hian Superintendent of Police, Executive Magistrate, DTO bakah MADC-a RTO, LAD leh MTP aiawhte an tel a ni.

Pu Lalhmunsanga Hnamte, District Bawrhsap chuan Christmas leh kumthar ralmuang leh hlim taka hmang turin venhimna lamah tan lak nasat a ngai a ti a. A bik takin Siaha District chhung mipuiten zalen leh ralmuang takin he hunpui lo thleng tur hi lawm se a duh tih a tarlang. Mi awm tha duhlo te avangin hunpuiah zalenna leh ralmuanna tha a awm lo palh ang tih a hlauhawm a , mipuiten nuam, zalen leh ralmuanna hnuaiah hunpui an hman ngei theih nan sawrkar official-te theihtawp chhuah turin a chah bakah khawtlang hruaitute tawiawmna tha a sawm bawk. Christmas leh kumthar lo thleng tur hlim leh lawm taka hmang turin Siaha mipuite duhsakna a hlan nghal a ni.

Pu Dingluaia Siaha SP pawhin thusawiin Christmas leh kumthar hunpui lo thleng turah mipuiten hlim leh ralmuanna hnuaia hun an hman theih nan hmalak tan mek a ni, a ti a. Police- te kutah engkim dah lova khawtlang hruaitute leh mipuite nen thawhhona tha a tul hle tiin, thawhpuiah a sawm a, Christmas leh kumthar chibai bukna a nei bawk.

Thutkhawmah hian thil pawimawh hrang hrang sawiho a ni a. Halpuah, Halmawi leh puak thei thil dang, boruak tha lo siam thei leh ri bengchheng siam thei chi reng reng bakah Naupang Silai lem a mu hmang chi reng reng Siaha District-a lakluh, zawrh, hralh, hal leh hman khap turin District Magistrate-in thuchhuah lo siam se tih a ni a. Hemi kawnga hmalakna ah hian khawtlang hruaitute, tlawmngaipawl aiawhte leh mipuite thawhhona thatak awm se an ti.

Zu leh ruihhlo dang reng rengah Excise leh Police ten uar leh khawngzawkin hma la se tih a ni a. Hunpui chhungah venhimna thazawk a awm theih nan Superintendent of Police leh MTP lam ten Duty-na hmun tur leh duty kalpui dan tur felfai zawkin ruahmanna lo siam se tih a ni bawk.

Hunpui lai hian Bazar a lun thin hle a, mipui tam zawkte mamawh lei a an chhuah thin avaning motor park dan tur leh motor chetvel dan turah ruahmanna felfai tak a awm a tul hle an ti a. Felfai leh awmzia nei zawka motor park a nih theih nan leh motor chevel ah harsatna a awm loh nan DTO, Traffic Police, leh MADC-RTO, LAD lam ten lo sawihoin ruahmannna lo siam se an ti bawk a ni.