4761/2025-2026

Dated Siaha, the 10, March 2026: Vawiin chawhma dar 10:30AM khan DC Mini conference hall, Siahaah Village council paruk inthlan ṭhatna (by election) neiha hman tur draft electoral roll chu District Election Officer leh Bawrhsap nibawk Pu VL. Hruaizela Khiangte chuan a tlangzarh.

Thu sawiin Pu VL. Hruaizela Khiangte chuan vote nei thei tura roll-a inthunluh chu ram leh hnam humhalhna rilru pu chunga neih tur nia a hriatthu sawiin, “Mikhual chamrei, nungchang ṭha; kohhran leh khawtlanga inhmang tak annih avangin India khua leh tui dik tak an ni tihna a ni lo, an harsatna ṭanpui hi a ṭhaa; roll-a thun erawh kan bat a ni lo,” a ti.

Election officer Pu Vanlalchhuanliana chuan Inthlan ṭhatna (by election) neihna tur khuate chu general seat vek a nih thu sawiin, chungte chu - Meisavaih East (seat 2), Thosai (seat 1), College Vaih II (seat 1), Noaotlah III (seat 1), Tipa V-III (seat 1) leh Khaikhy (seat 1) a ni a, hemi huam chhunga vote nei awmzat chu 2496 niin, chhungkua 659 an nih thu a sawi. EO chuan April 2026 aṭangin Siaha district-ah Special Intensive Revision (SIR) neih tum anih thu leh hemi hunah hian thil inthlak tam tak awm thei anih avangin party tin leh NGOs aiawhte chu thawhpuiah a sawm nghal.

Vawiin hun hmannah hian party hrang hrang aiawh, AERO leh Election branch staff-te an tel a, DEO hian party tinte chu draft electoral roll copy khat ṭheuh a sem nghal. Claims & objection hi March ni 20, 2026 thleng thehluh theih niin; final electoral roll hi March ni 27, 2026-ah tlangzarh tum a ni. Draft electoral roll tlangzarh anih hnu hian Election officer Pu Vanlalchhuanliana hovin AERO te tan training neih chhunzawm nghal a ni.