4762/2025-2026

Kolasib, the 10th March, 2026: Vawiin khan I&PR Conference Hall, Project Veng, Kolasib-ah International Women’s Day 2026 pualin Women and Child Development, Kolasib bultumin Mahila Jan SunWai (Free Legal Public Hearing) buatsaih a ni. He hun hi Kolasib Additional Deputy Commissioner (Addl. DC) Pi B. Malsawmtluangi chuan khuallian niin a hmanpui.

Khuallian Pi B. Malsawmtluangi chuan tunlai khawvelah hmeichhiate chuan kawng hrang hrangah hma an sawn nasa hle tih sawiin, hmeichhe dinhmun inthlak danglam chho zel chu lawmawm a tih thu a sawi a. Politics-ah pawh VCP atanga MLA thlengin hmeichhia hmuh tur an awm ta chu hmasawnna ropui tak a nih thu tarlangin, Mizoram Legislative Assembly-ah hmeichhia pathum ngawt mai kan nei chu chhuanawm a tih thu a sawi.

Politics chauh ni lovin, infiamna (sports) lamah pawh boxing, football leh volleyball-ah te hmeichhiate an langsar hle a. Eizawnna kawng hrang hrangah pawh mipa tih chi anga ngaih thin two-wheeler taxi, auto rickshaw leh sumo khalh thlengin hmeichhiain an ti ve thei ta a, sumdawnna kawngah pawh sa sat thlengin hmeichhia an awm ta chu lawmawm a tih thu a sawi bawk.

Tun hma chuan hmeichhiate chu mipa lakah an innghat tawp thin a, tunah chuan mahni inchawm zo leh ding chhuak thei an ni ta chu lawmawm a tih thu a sawi. Hmasawnna nasa tak karah hian hmeichhe fing nih a pawimawhzia sawiin, Addl. DC chuan, "Eng anga dinhmun sangah pawh ding ila, mipate zah leh chawimawi thiam hi kan zir a ngai a. Hmeichhe fing leh Pathian tih mi nih hi a pawimawh em em a ni," a ti.

Hmasawnna tur tam tak hmeichhiate'n an la neih thu tarlangin, khuallian chuan mahni hmeichhe puite initsik lova inchawimawi tawn leh inkaitho tawn turin kalkhawmte a chah a. Hmeichhe pawl hrang hrang, a bikin MHIP te chu chak takin an thang chho zel a, heng pawlte hi hmeichhiate inchawikang tawnna leh inthuamchak tawnna atana hmanraw pawimawh tak an nih thu a sawi bawk.

He hunah hian Pi Rinpari Ralte, Member, Mizoram State Commission for Women, Aizawl pawhin thu sawiin, Women Commission hmalakna point 13 a tarlang a. MSCW chuan kum kalta chhung khan case 143 dawngin, theih anga complaint te chu chinfel a nih thu a sawi. Hmeichhiaten harsatna (Complaint) an neih te chu Aizawl kal kher ngai lovin District Programme Officer, Kolasib hnenah engtik lai pawhin a thehluh theih tih a sawi a. Hmeichhiate chu 'primary care giver' an nih thu leh, hmeichhiate zalenna hmunah chuan vantlang khawsaknaah ralmuanna a awm thin thu a sawi bawk. Tun dinhmunah Mizoram Women Commission-ah member 6 an awm mek a ni.

Inkhawm hi Pi Lalnunpari Hmar, District Programme Officer, WCD chuan a kaihruai a. He hunah hian Kolasib District huamchhunga hmeichhe dinhmun chawi kanga, vantlang tana thawhhlawk leh midangte tanpui thin (Women Achiever) te hnenah chawimawina hlan an ni a. Pi Elizabeth Lalmuankimi, DMC, DHEW chuan lawmman semna hun hi a hmang a ni.

Chawimawina dawngtute chu:

• Pi Happy Laldingliani, Kolasib Project Veng.
•  Pi Lalnunziri, Kolasib College Veng.
• Pi Jenny Sapthanhnuni, Founder, Omega Centre, Bairabi.

Hmeichhia chunga hleihlenna tawkte tan counselling leh Free Legal Public hearing neih nghal a ni a. He hunah hian Addl. SP Kolasib, Judicial Officials, Women & Child Development hnuaia Office hrang hrang - ICPS, One Stop Centre, Shakti Sadan Staff te, MHIP Sub-Hqrs hruaitute, Anganwadi worker te leh Indian Christian Women Movement atangin mi thahnem tak an tel a ni.