440/2024-2025

Dated Siaha 9th May 2024 : Vawiin chawhma dar 11 khan Local Administration Department (LAD) MADC bultumin 'Cleanliness Awareness Campaign' hawnna inkhawm chu MADC Golden Jubilee Hall-ah neih a ni a, Pu K. Vanlalliana, Executive Secretary, MADC chuan khuallian niin a hmanpui.

Khuallian chuan ni pawimawh leh chhinchhiah  tlak taka sawm a ni chu lawmawm a tih thu a sawi a. Vawiin atanga faina lama theihtawp chhuaha hmalak a nih  chuan hmalam hun a eng dawn hle a ni, a ti. Kum upa lam chuan chindan thanlenpui an neih hi  tihdanglam an harsat tawh thin  tih tarlangin, thalaite zawk hian faina leh thianghlim kawngah hma an hruai a tul tak zet a ti . Faina leh thianghlimna hian natna tam tak lakah min veng tih hriat a tul a, natna tam tak laka min ven avangin, sum leh pai tam tak khawhral lo tura faina ngaihpawimawh a tul hle a ti.

Pu K. Vanlalliana chuan rilru leh taksa hrisel nei turin faina a pawimawh hle a ti a. Faina kawngah mahni  taksa vawnfaiah duhtawk mai tur a ni lo a, silh leh fen, ei leh in, in chhung bungrua piah lamah khawtlang vawnfai thlengin a huam tih hriat a pawimawh hle a ti. Faina leh thianghlimna chu inzirtir ngai tak a nih rualin, rilru atang lo irhchhuak tur a ni tiin nu leh pa, zirtirtu leh khawtlang hruaituten mawhphurhna lian tak an nei a ti a. Mahni maia hmalak a harsa thin a, midangte kan zirtir zel chuan mipui nawlpui nena hmalakna tha tak a hring chuak ang a, chu chuan faina lamah rah tha tak min pe dawn a ni, a ti.

A bik takin  NGO te hmalakna  a sawt bik hle nia  ahriat thu tarlangin Pu K. Vanlalliana chuan  NGO te chu faina lama an hmalaknate  thahnem ngai taka  chhunzawm turin a ngen  a ni.

Pu K. Vanlalliana  chuan Siaha khawpui a lo fai leh thianghlim zawkna  turin a chhunga chengte kan pawimawh ber a ti a.  A chhunga chengten hmangaih taka faina leh thianghlimna kawnga hma kan la lo a nih chuan kan distrcit pawh hi chenna tlaklohah  kan siam ngei ang  tiin thahnem ngai taka hmangaihna nen kan enkawl a tul hle a ti a. Kawng engkimah hmasawnna tur nei kan ni tih hriain thahnem ngai takin faina leh thianghlimna kawngah tan i la thar ang u tiin kalkhawmte leh Siaha mipuite a sawm nghal.

Dr. Lalnunziri, Sr. CMO chuan taksa fai taka vawn hian natna tamtak lakah min venghim thin tih sawiin, damlohna tam takah min veng bawk a ni a ti a. Taksa vawngfai loh avangin natna thehdarhtu kan ni  thei fo a, keimahni mai ni lo in midangte tan harsatna kan thlen thei tih hria a, taksa fai taka vawn i tum ang u tiin a fuih a .Tunhma lam ngaihtuahin  faina lamah hma kan sawn hret a, chutih rualin faina kawngah hmalak reng a ngai a, rilru pawh  kan siam  thar reng a tul hle a ni, a ti. Bawlhlawh paih kawngah hmasawn a tul hle tih tarlangin Dr. Lalnunziri chuan bawlhlawh a bawm ah chauh paih thin ila,  chu chuan khawtlang vawnfai kawngah hlawk takin  min puih dawn a ni a ti. Faina kawngah a tifaitu kan ni theilo a nih pawhin a tibaltu nih loh  hram i tum ang u tiin a sawm bawk.

Pu Ngurthansanga SDO (S) pawhin thutawi sawina neiin, faina chungchang kan ngaithlain inzirtirna pawh kan kalpui nasa tawh hle a,  hun bik emaw program hmanlai chauh a fai tum hi a tawk tawh lo a,  a taka nunpui a hun tawh tak zet a ni, a ti . Faina kawngah sum leh pai tamtak sawrkarin a sengral tawh tih tarlangin, sum peh pai seng  hu hian mipuite pawhin tan kan lak a hun hle a ti. Thalaite khawvel anih tawh angin thalaite hian faina lamah  tan la thar leh i la, zirlaite pawhin hmachhawp neih i tum ang u a ti a . 

Pu Ngurthansanga chuan tunhnai lawk khan Mizoram pum faina  in elna ah  Siaha district-in pathumna dinhmun a hauh tih tarlangin a pawimawh  ber chu hnungtawlh lo  a, hmalam pana kan kal  zel hi a ni, a ti. Mimal emaw sawrkar ang chauhin hmalak  a hrasa thin tiin mitinin  mawhphurhna  kan nei tih hriain faina lamah hmasawn zel i tum ang tiin  Siaha mipuite a sawm  a ni.

Pi S. Lalmuanpuii, Sr. Local Administration Officer, MADC chuan 'Single Use Plastic' tih thupui hmangin kalkhawmte zirtirna a pe a, Pu Henry P. Hnaihly, Sanitation Officer, MADC chuan 'Cleanliness and Segregation of Waste' tih thupui hmangin zirtirna hun a hmang bawk.

Vawiin 'Cleanliness Awareness Campaign' hawnna inkhawm hi Pi S. Lalmuanpuii, Sr. LAO, MADC chuan  kaihruaiin, Pu Joshua Chozah, Under Secretary, LAD, MADC chuan  kalkhawmte hnena lawmthu sawina neiin hun a khar a. NGO hruaitute, khawtlang nu leh pa bakah sawm bik school naupangte an tel bawk a ni.