2676/2023-2024

Dated Siaha 5th November 2023 : Mizoram Legislative Assembly Inthlanpui lo awm tura inbuatsaihna kal zelah vawiin khan District Election Officer, Pu Lalhmunsanga Hnamte kaihhruaina hnuaiah venhimna lam thawktute chuan DC Mini Conference Room-ah thutkhawm an nei.

Pu Lalhmunsanga Hnamte chuan inthlanna felfai leh thianghlim tak nei turin venhimna lam thawktute chu theihtawp chhuah turin a chah a. A bik takin Siaha District chu Myanmar nena ramri nei anih avangin fimkhur a tul zual a ti . International border leh inter- district -a venhimna thawktute chu khauh zawka venhimna hna thawk turin a chah bawk.

Election Commission of India in inkaihhruaina a siam (SOP for 72 Hours) angin International border leh inter- district a venhimna thawktute chu vote thlak hma ni thum (P-3) atangin khauhtaka venhimna kalpui turin a ti a. Assembly Constitency huam chhunga motor lut leh chhuak te chuan Silai leh dan phalloh thil an phurh leh phurh loh te endik turin a ti a, hei hian inthlan result puan ni thleng a huam dawn a ni. International border- a venhimna thawkte chu vote thlak ni hma nithum (P-3) atanga November ni 8 thleng International border chu uluk tak khar turin a ti bawk. Siaha leh Myanmar border venhimhna hi 20- Assam Rifles an thawk mek a ni. Siaha District-a venhimna uluk ngai bik (strategic point) Lobo, Phura leh Kaocho chu Mizoram Police ten venghimna an enkawl dawn a, Ainak, Archhuang leh Nao-Aotlah te chu Assam Rifles-te hian an venghim dawn bawk a ni.

Vawiin thutkhawmah hian Pu Dingluaia, Superintendent of Police, Pu C. Lalruatkima, Addl. SP, Pi B. Malsawmtluangi, Asst. RO (39-Saiha A/C), Capt. Harsimrat Singh (OC Lawngtlai) leh Subedar A.S.Bisht (20- Assam Rifles) te an tel.