830/2026-2027

Siaha, 4th June 2026: Vawiin chawhnu dar 12:30 khan DC Mini Conference Hall, Siahaah Green Mizoram Day 2026 hman dan tur relin ṭhutkhawm a ni a, District Level Committee on Green Mizoram Chairman leh District Bawrhsap nibawk Pu VL Hruaizela Khiangte chuan he hun hi a kaihruai.

Pu Jimmy N. Ramdina, Member Secretary leh Deputy conservator of forest, MADC Siaha nibawk chuan kum hmasa lama green Mizoram day hman dan report pein nikumah department hrang hrang leh tlawmngai pawl te’n thing ṭiak 5750 an phun a, heta ṭang hian zaa sawmkua (90%) a nung a, thing ṭiak phun zawng zawng hi hung vek anih bakah a theih ang angin enkawl chhunzawm ṭhin anih thu a sawi.

Green Mizoram Day (June 11, Ningani) zing dar 7:30-ah Green Mizoram Day Inaugural Function chu  Forest Hall, MADC Complex, Council Vaihah hman tur niin, khuallianah Pu Tiahlei Syuhlo, Executive Member i/c Forest a ni ang. Kumin thupui chu ‘Thing hi rangkachak anga hlu, Nunna tinreng bul a ni’ tih a ni.

Kumin Green Mizoram Day pual hian thing ṭiak chi hrang hrang Tisopi road leh Tipi Ferry road-ah phun tum a ni. Vawiin ṭhutkhawmah hian District Level Committee member-te an tel ṭha hle. Chairman-in lawmthu sawina a nei a, hun hman tihtawp a ni.