831/2026-2027 

Aizawl, 4th June, 2026: Young Indians Mizoram buatsaih Young Indians Parliament, 2026 chu vawiin khan neih a ni a, Assembly Speaker Pu Lalbiakzama chuan khuallian niin a hmanpui a, Pu Vanlalzawma ex-MP chu khualzahawm a ni.

He hunah hian khuallian Pu Lalbiakzama chuan thu sawiin Young Indians, Mizoram-te'n Young Indians Parliament hun lawmawm leh chhenfakawm tak an buatsaih chu lawmawm a tih thu sawiin, he hun hmang tura lo kal zawng zawngte chu hlawkthlak taka hmang theuh turin duhsakna a hlan a ni.

Khuallian chuan politics khawvelah hian India ramah kum naupangten hmun an chang tam lo hle a, kum 35 chin tan President a nih theih laiin President ni tawhte kum chawh rual chu kum 71.4 a ni a, kum 40 mi a niha Prime Minister ni thei Rajiv Gandhi bak kha chu Prime Minister naupang tak kan la nei lo bawk a, chutih rualin Mizoramah pawh thalaite hi kan lang lo hle a, kan Chief Minister neih tawhte kum chawh rual chu kum 56 vel a ni, a ti a. Ram dang ang bawkin Mizoramah hian thalaite an tam zawk hle a, nimahsela politics ngaihven lo anga sawi kan ni fo thin a. Chutiang tur ting chuan politics hi kan ralthlir thin reng em tih pawh ngaihtuah theih tak a ni a, a tam zawk hi chuan a chhunga tel emaw luhchilh kan tum lo a, kan zir chiang taima tawk lo bawk a, chuvang chuan a nawlpui hian kan ram politics sukthlek kan hre lo hle reng a, hei hi kan ngaihtuah tawk loh vang a ni a ti a. Thawkkhat lai phei kha chuan politics hi 'sual' ang thawthangah kan ngai emaw tih mai tur a ni a, Kohhran Upa leh kohhran mite tel vena tlak lo ang hiala ngaih hunlai kha a awm. Hei vang hi nge active politics kher loah pawh kan tel tha lo (passive participation) hle a, hemi kawngah hi chuan kan nu leh pate hi kan tluk lo niin a lang a. Vote thlak kawngah pawh a tam zawk hi chuan mahnia ngaih dan siam tum loin, chhungkaw thutlukna ang kan vote deuh mai mai thin niin a lang a, hei hi thil pawi tak a ni, a ti.

Khuallian chuan kan duh emaw duh lo emaw kan ram hruaitu tura kan thlan tlin apiangte kaihhruaina hnuaiah hian kan awm a ngai tho tho a, chuvangin min hruaitu tur kan thlan dawn hian ngaihtuahna kan sen a ngai a. Ram hruaitu thlanna hi 'mi lar' emaw, 'mi fel ber emaw 'kohhran hruaitu thlanna a ni lo a. "Tu hi nge ram kaihruaitu atan tha ang a, tu hian nge a ngaihna hria a, tun hian nge tuna kan dinhmun aia tha zawkah min hlang kai thei ang?" tia Mizo thalaite hian kan ram dinhmun leh kan politics kalphung hi ngun taka kan zir peih a hun tawh khawp mai a, chumi tur chuan kan nu leh pate emaw, kan pi leh pute kan beisei ngawt tur a ni lo a, "Kan kal dan pangngai hi tha kan ti," ti ringawt lo deuhin, ngaihtuahna fing leh zau zawk pu zel ila. A tul hunah chuan rilru huaisen tak puin pen chhuak ngam ila, State hmasawn zawka an kalphung kan, ban phak tawka awmte 'copy paste zelin tan la thar ila a duhawm hle mai a ti a. Tun hnai maia kan hriat lar em em social media hmang hian thu belh chian dawl lo, tlanchhe chunga mi dang beihna a la tam hle mai a, hei pawh hi ngaihtuah chian chuan a dawihzepthlakin sim a hun ta hle mai a ti bawk. Politics-ah hian insawi chhe tawn leh thu awmze nei loa inbei chiam chiam loin a kal theih a, 'issue' te khelin debate awmze neite pawh a neih theih. Chu'ng atan chuan 'policy' te sawihoin 'ideology' kan neihte phawrh tlang ila, zawi zawiin kan ram hi kan siam tha thei ang tih ka ring tlat a. Vawi leh khata sang taka invawrh a harsa tih chu kan hre theuh a, chutih rual chuan tun aia tha hi chuan kan ti thei chiang a ni. Hetiang taka politics hi kan ngaihven a nih chuan thalai fel zawk, fing zawkte a cho chhuak ngei ang tih a rinawm a, tuna politics huanga lut kum naupang zawkte hian kum upa zawkte aiin ram hruaina kawngah an hnufum loh zawk zia te, kum naupang tein ram an hruai ve thei a ni tih hi lantir thei se la chuan, thalai dangte politics huang chhungah luh duhna a neihtir ang a, mi tha leh felten ram rawngbawl duhna neiin tun ai hian ram pawhin hma a sawn zawk ngeiin a rinawm a ti bawk.

Young Indians Parliament, 2026 ah hian Pi christine L. sailo, NMT, Young Indians chuan inlawmna thu a sawi a, Mizoram Legislative Assembly official-ten Parliamentary Procedures leh inkaihhruaina dan chi hrang hrang an sawifiah a, House-a sawrkar siam dan kalphungtem house discussion te, Policy/Bill drafting briefing te neih a ni a, kalkhawmten Assembly House an tlawh bawk a ni.