3076/2022-2023
Aizawl 16th December 2022: Vawiin 16.12.2022 khan Sialkal Range Development Council (SRDC) hnuaia Council meeting chu Dr. L. Thangmawia, MLA, Chairman, SRDC kaihhruaiin SRDC Headquarters Office., Mimbungah neih a ni.

He Council meeting-ah hian thu pawimawh hrang hrang rel a ni a, SRDC Manual hman mek ennawntu, review committee in rawtna a siam, Draft SRDC Manual - 2022 chu sawihona neih a ni a, sorkara kalzel tura pawm a ni. SRDC huamchhung khaw hrang hrangah Faina leh thianghlimna kawnga hmalakna beihpui thlak ni se, kumthar kumbul lamah a bulṭan nan hmalak nghal ni se tih te, Council huamchhunga zirtirtu indaih lohna bik khua- Vaikhawtlang leh Selam khuaa zirtirtu rawih te tana lawmman pek dan tur chungchang te leh, SRDC hnuaia Culture & Literature Committee in tunhnaia report an thehluh  chu sawihona neih a nih hnuah lungrual takin an pawm bawk. SRDC fund hmang hian zirlai rethei, lehkha thiam thei si te chu ṭanpuina pawisa pek ṭhin an ni a, tun sorkar kum kalmekah pawh zirlai thiamthei thlanchhuah mi 9 hnenah ṭanpuina sumfai sem a ni bawk. SRDC area chhunga sorkar leh khawtlang enkawl school a pawl 9 leh pawl 11 zirlai thlanchhuah bik te tan kumthar school chawlh hun remchangah study tour neihpui tura rawtna awm chu pawm a ni a, Council member te tana exposure tour neih ni se tiin an rel bawk.

Meeting chuan SRDC huamchhung aṭanga Kawlbem Small Hydel Project, 4.00 MW pechhuak thei tunhnaia hawn a lo ni ta leh, Mimbung to Tuivai kawng laih zauh hna thawh mek a nih avangin Mizoram sorkar chungah SRDC Council meeting chuan lawmthu a sawi a. Tin, he meeting-ah hian tunhnaia Mizoram University atanga doctorate degree nei thar, Dr. L. Thangmawia, MLA, SRDC chairman chu an lawmpui thu te, ram rawngbawl chunga hetiang hlawhtlinna ropui a sual chhuak thei chu an chhuan thu tarlan a ni bawk.

SRDC huamchhungah khaw paruk (6) awm mekin, Headquarters chu Mimbung a ni a, Cell Office Aizawl Venghluiah a nei a ni.