No.7366/2020-2021 

Vawiin hian Serchhip Deputy Commissioner Pu Kumar Abhishek, IAS ruahmannaa duan Sikul Chhawm Rawh (Adopt a School) Programme hawnna inkhawm Serchhip DC Conference Hall ah neih a ni a. He programme kalpui dan tur inhrilhhriatna leh a hmasa ber atana Sikul Chhawm tur thlan te puan a ni.

He hunah hian khuallian Pu Kumar Abhishek chuan, Sikul chhawm rawh programme kalpui tura a ngaihpawimawh zual tarlangin mipuiten kan khuaa sawrkar sikulte chu tun aia neitu thinlung pu zuala, mahni ta a nih anga a tulna apianga chhawmdawl leh tanpuia, ngaihven leh zual nan te, district chhunga zirna dinhmun tha zawk kan neih theih nante leh hmanrua leh sikul mamawh zualpuite phak ang tawka kan inngaihtuahpui zel theih nan he ruahmanna hi duan a nih thu a sawi a. A naupan laia sawrkar sikula kal ve thin tho a nihna atanga a tawnhriatte chuan a rilru a luah reng tih sawiin IAS a zawm tirh atanga a thil tum langsar zingah a phak tawka zirna tihhmasawn zel a nih thu a tarlang a. A vawi khatna atana Sikul Chhawmtu tur Officer te chu an Sikul thlan tlawh nguna, vil uluka an theihna apianga tanpui tlat turin a chah a ni. Bawrhsap hian sum awmsa engmah a awm chuang lova nimahsela a theih chen chenah convergence te dap a ni ang a, Corporate Social Responsibility sum te pawh dap theihna tur chi a awm chuan dap a ni ang, tiin kalpui dan tur thenkhat a tarlang a, sikul tihhmasawn nan pawisa a pawimawh ber lo theia, thawktute leh naupang leh khawtlang inpekna ten nasa takin thil a thlak danglam thei a ni, a ti.

He hun Pu Lalmuansanga Ralte, MCS, Addl. DC kaihhruaiah hian he Sikul Chhawm Rawh hmalakna kalpui dan tur tlangpui Pi C. Lalduhzuali, MCS, SDO Sadar in a sawifiah a. He ruahmanna hi Central emaw State sum emaw hmanga kalpui nilovin Serchhip District Administration in a hnuaia Office peng hrang hrangte nena tangruala an kalpui tur a ni a. A vawi khatna atan kumin Academic Year ah hian Pilot Project angin Serchhip SDO Sadar Office, Thenzawl SDO Office,  N. Vanlaiphai SDO Office, Serchhip BDO Office leh E. Lungdar BDO Office ten an bial chhunga Sikul an chhawm tur pakhat theuh an thlang anga, chung an sikul thlan te chu kumkhat atan he programme kalpui dan tur duan sa angin a theihna kawng kawngah an tanpuiin an chhawm dawn a ni.

A tum khatna atan hian Serchhip SDO Sadar chuan Bungtlang M/S a chhawm ang a, Thenzawl SDO Office in Govt. Thenzawl H/S, N. Vanlaiphai SDO Office in Govt. Oriental M/S, Serchhip BDO Office in Khumtung P/S leh E. Lungdar BDO Office in E Lungdar P/S II te an chhawm dawn a ni.

He hunah hian Pi Zohmangaihi, DEO pawhin thusawina hun hmangin Serchhip in zirna ngai pawimawha sawrkar sikul te hlut thiam tak Bawrhsap kan nei chu lawmawm a tih thu a sawi a, Sikul Chhawm Rawh Programme ngaihtuah chhuaka a taka kalpui a ni dawn ta chu Serchhip leh Mizoram tan pawh ni chhinchhiah tlak nia a hriat thu sawiin lawmthu a sawi a ni. 

Vawiina a hawnna inkhawmah hian heng sikul chhawm tur khaw VC aiawhte, sikul thawktute leh sawm bik mi thenkhat leh Media mite an tel a ni.