Aizawl DC chuan Inthlan laia tih thin dan angin tun Lok Sakha leh Aizawl West I Bial Assembly Bye-Election lo awm turah pawh silai nei zawng zawngin anmahni bialtu Police Station/Out Post hnai berah an silai tung vek turin March ni 4 khan thupek a chhuah a. Nimahsela, silai nei thahnem takin he thupek hi an la zawm lo nia hriat anih avangin, him leh tluang taka Inthlan neih a nih thei nan a hnuaia ami ang hian vawiin khan Aizawl DC in hemi chungchanga thu pek a chhuah nawm leh a ni.

‘Tun thlengin silai la tung/ dah duh lo an awm tih hriat a ni. Arms Licence neite hi DC Office ah record a awm vek a. Tun thlenga la tung/ dah lote pawh hriat a ni a.

Chuvangin April ni 1 (Thawhtan Ni) ral hma ngeia an silai an tung/ dah lo a nih chuan Sec17(3)(b) of Arms Act, 1959 tlawhchhanin an silai licence sut (revoked) sak leh a ni ang a, tin Section 188 IPC hmangin an chungah hremna lek a ni bawk ang’.

He thupek hian Magistrate, Armed Forces, Police, BRTF leh District Magistrate in phalna a pek te erawh a huam lo ang.