2809/2024-2025

Dated Saitual the 1st November 2024 : Vawiin chawhma dar 11:00 am khan Sinlung Hills Council inthlan vawi hnihna 5th November , 2024 (Thawhlehni) a lo awm tur atan Saitual District Election Officer leh District Bawrhsap ni bawk Dr Lalngura Tlau chuan a Office Chamber-ah press mite a kawm a, Saitual District-in Sinlung Hills area huam chhunga inthlan buaipui a nih dan sawifiahin inthlang turin engkim peih fel a nih tawh thu a sawi.

Saitual Bawrhsap chuan inthlanna muanawm, fel fai leh thianghlim an neih ngei theih nan inbuatsaihna pawh an phak chinah a tha thei ang berin an kalpui thute, Inthlan buaipui tura ruatte pawh engkim training pek vek tawh an nih tawh thute leh a huna che chhuak mai thei turin an inring tawh niin a sawi a. Chanchinbumite chu theih tawp chhuah a, inthlan kaihhnawiha chanchin thar awmte bengvar tur leh chanchin thar dik leh rintlak mipuite hnena chhawp chhuak tura a beisei thu leh tha taka MLA/MP inthlana an lo thawkho tawh ang khan tun tum inthlan lo awm turah pawh thawhho puiah a sawm a ni.

Polling party (Inthlan buaipuitu) te chuan November ni 4 (Thawhtanni) zing Dar 8:00AM ah DC Office atangin an duty-na tur hmun an pan ang a, November ni 5 zing dar 7:00 atanga tlai dar 4:00 thleng vote thlak hun hawn ani ang. Vote thlak turte hian Ballot Paper an hmang ang.  Vote thlak ni tlai dar 4:00PM atanga chhiar leta darkar 48 chhung chu ‘Silent Period’ niin campaign phal a ni tawh lova, pawn lam mi campaign puitute pawh bial chhuah san tawh tur a ni.

Sinlung Hills Council inthlan vawi hnihnaah hian Bial 12 awmin chung zing atang chuan Saitual District huam chhungah Bial pali, Khawlian, Phuaibuang, Suangpuilawn leh Vanbawng a awm a, heng bial pali atang hian Candidate 17 ten Council seat an chuh dawn a, Khawlianah candidate 6, Phuaibuang leh Suangpuilawn ah 4 ve ve awmin  Vanbawngah candidate 3 awmin an tlem ber dawn a ni. Bial tinah INC, MNF leh ZPM ten Candidate neiin an chuh kim vek dawn a ni.

Vawiina Bawrhsapin Press mite a kawmnaah hian Saituala MJA member te leh Pi F.Zodingpuii DIPRO, Saitual te an tel a ni.