Kum 5 chhunga India ram khawpui thlan bik changkang zawka thawmthat tumna Smart Cities Challenge vawithumna 31.03.2017 a neihah Aizawl khawpui chu thlanchhuah zinga a lo tel tak avangin sawrkar chuan chak taka hmalak a tum a. Vawiin khan UD&PA Minister Pu Zodintluanga hovin a pisaah UD&PA hotuten Smart City chungchanga inrawnkhawmna neiin chak zawka kalpui (implement) dan tur an rel.
Aizawl Smart City-a siam turin sawrkar laipui chuan State sawrkar hnenah kum 5 chhungin cheng vaibelchhe zanga a pe dawn a, a thawhkhatna atan cheng vaibelchhe 200 pe in cheng vaibelchhe 300 dang chu kum tin vaibelchhe 98 zela then hrangin a pe dawn a. He mission hnuaiah hian state tin te chuan an hmalak dan tur ruahmanna chipchiar takin an siam a, Mizoram sawrkarin Aizawl khawpui, tunlai thiamna hmanga thawm that dan tur ruahmanna an siam chu mi pawimawhte hian meeting-ah hian an thlir ho a ni. Aizawl Smart City Plan hi hlawm lian tak pahnih - Area Based Development leh Pan-City Development tia then a ni a. Aizawl khawpui chhunga ruhrel lian tham awmsa cheimawi leh thawm that hna te, kawng siam hna te, mipui punkhawmna hmun tha zawk siam te, inkalpawhna kawng pengthuam chei te, mipui mamawh tur thil thar sak belh te, tui supply te, bawlhhlawh sawngbawl lam hawi te, mipui himna leh hriselna lam kaihhnawih te telin kawng tinrenga tunlai changkanna mila mipui vantlang mamawh siam belh leh cheithat hna a huam kim hle a ni.
Smart City kalpui tur hian Mizoram sawrkar hnuaiah Company Act hnuaia in ziak lut Special Purpose Vehicle (SPV) ‘Aizawl Smart City Limited (ASCL)’ din a ni dawn a. ASCL atan hian interim CEO leh Board of Directors ruat tur niin Board of Directors Chairman atan UD&PA Secretary Dr. C.Vanlalramsanga leh interim CEO atan UD&PA Joint Secretary Pu Vanlalmawia te chu rawt an ni. SPV siam tur hian Cabinet pawmpuina a ngai dawn a, hei bakah official level a tih fel tur dangte ti fel thuaia, Smart City Mission kalpui a nih tur thu UD&PA Minister Pu Zodintluanga chuan a sawi a ni.
Meeting-ah hian UD&PA Secretary Dr. C.Vanlalramsanga, UD&PA Joint Secretary Pu Vanlalmawia, UD&PA Director Joseph H Lalramsanga leh mi pawimawh dangte an tel a ni.
