Pu R.Romawia, Higher & Technical Education Minister vawiin khan Govt. T.Romana College Graduation Day, Freshers’ Social leh Magazine tlangzarhna inkhawm Vanapa Hall-a neih chu a hmanpui.

Minister chuan Education hi mihring thiltihtheihna tihchangkanna hmanrua a ni a, ram changkang apiangin education hi an ngai pawimawh a ni a tiin khawvela zirna sanna hmun apiangah ei leh in fimkhur a tulzia hriain heng ramahte hian Life Expectancy hi a sang thin a ni a ti. Nu leh paten zirlaiteah beiseina sang tak neiin an phak ang tawk theuhin sum leh pai an seng a, he an beiseina tihhlawhtlin hi zirlaite tihmakmawh a ni Minister chuan a ti.

Mizoramah hian ei tling ngei tura zirna kan uar a tul tawh thu sawiin hei bakah hian zirlaite chu inelna thianghlim rilru pu chunga an zirlaite zir turin a fuih. Taimakna leh rinawmna nen lehkha an zir chuan ram tana chhenfakawm leh rotling an nih ngei a rin thu Minister chuan a sawi bawk.

Minister hian Govt. T.Romana College Magazine ‘Raltiang’ a tlangzarh nghal a. He College Principal Dr F.Lalhmingsanga pawhin thu sawiin he college-a zirtirtute thahnemngaihna leh taimakna zarah tun dinhmun hi he college hian a thlen thu a sawi. Kumin hian zirlai passed chhuak 116 neiin zirlai thar zali chuang an awm a ni.