No.7269/2020-2021 

Social Welfare Minister Dr. K. Beichhua chuan vawiin khan Tlahpi Bypass Road leh Chhaolo to Beino lui, Economic link road sial tur a hmunah tlawhin a enfiah.

Siahatla to Noaotla panna kawnga Tlahpi Bypass road hi kum 2016 khan MGNREGA, ni 100  inhlawhna atang te leh MADC sum  pawhkhawm  atang te in bul tan tawh niin, cheng nuai 240 sen tawh a ni. BADP 2019-2020 Additional fund atanga chhunzawm tura ruahman leh a ni a, cheng nuai 250 ruahman niin, kilometre 11 vela thui a ni.
Bypass road hi PMGSY hnuaiah lalut turin dilna thehlut tawh a ni bawk.

Chhaolo to Beino lui, Economic Link road sial tur hi Border Area Development Programme (BADP) atang a thawh tur a ni a, a bul tan nan cheng nuai 50 ruahman a ni. He economic link road  hi NEC atanga Lobo-Tluangram-Halkha road sial tur zuk pawh thla tura ruahman a ni a, kilometre 8 vela thui a ni.

Dr.K. Beichhua hian Chhaolo khaw sial vulhtute  tana AH & Vety Department in Fodder Plantation Project a kalpui mek te tlawhin a enfiah nghal bawk. Chhaolo khua hian sial 320 a nei mek a ni.

Chhaolo khua VC Court House-ah vantlang inkhawm neihah Dr.K. Beichhua chuan Chhaolo khuaah Rural Animal Health Centre building thar sak a nih tawh thu leh MCHP House te pawh sak mek a ni a ti a, ranchaw siamna bun an tum thu a sawi bawk.

Dr.K. Beichhua chuan Chhaolo khaw mipuite chu politics a inbeihna te bansanin, mahni kut leh kea dinchhuah theuh tuma, ei leh bara intodelh tura theihtawp chhuah theuh turin a sawm hlawm a ni.

Dr.K.Beichhua hi Pu Biakcheua MDC, MADC; AH&Vety Addl. Director Dr. H Laltlanmawia, District Veterinary Officer (DVO) Dr. Sahlu Khaila, EE PWD Division Siaha Er. Kaphmingliana, BDO Siaha Pu Vabeimozachhi Chozah, MJA member te leh party miten an tawiawm a ni.