Women’s Studies Centre, Mizoram University leh State Resource Centre for Women, Department of Social Welfare tangkawp buatsaihin vawiin khan Gender Equality and Women Empowerment in North East India with Special Reference to Mizoram tih thupui hmangin nileng awh seminar neih a ni a. Seminar hawnna inkhawm hi Synod Conference Centre, Aizawlah neih niin Social Welfare Minister Pu PC Lalthanliana chu khuallian a ni.
Pu PC Lalthanliana chuan hmeichhiate hamthatna, himna leh hmasawnna turin sawkarin ruahmanna hrang hrang a siam a, dan pawh engemawzat siam a ni tawh a, a hmang tangkaitu turin heng hi an hriat a, an hman thiam a pawimawh a ni, a ti. Hmeichhia te tihchak (empowerment) chungchangah tihchak ngai nia inhriatna nuaibo a, anmahniah theihna leh chakna neisa an nihzia inhre turin a fuih a. Mizo hmeichhiate chu an duai lova, ngaihtuahna fing leh remhriatna nei tha, hmangchang hria leh taima an ni tiin anmahniah ‘thei lo’ nia inhriatna an lo nei a nih chuan chu chu paiha, hmalam pana theihtawp chhuah turin Social Welfare Minister Pu PC Lalthanliana chuan Mizo hmeichhiate a chah a ni.
MZU Women’s Studies Centre Director Prof.Lalneihzovi chuan Seminar chungchang kamkeuna hun hmangin India ramah hmeichhia leh mipa inthliar hranna awm lova dinhmun inanga kan din theihna tura tan lak tulzia a sawi a. Ram rorelna, zirna, sakhua, ei leh bar zawnna leh kawng tin rengah hmeichhiate leh mipate dinhmun a la inthlau hle a, chuvangin intluktlanna tak tak nei thei tur chuan kawng thui tak zawh a la ngai niin a sawi a. Chutihrualin hmeichhiate pawhin an dikna chanvo leh hamthatna chauh ngaihven lova an mawhphurhna leh tih tur an neih te an hlenchhuah ve ngei a tul a ni, a ti.
Social Welfare Joint Director Pi Vanlalpianpuii kaihhruai seminar hawnna inkhawmah hian Social Welfare Secretary Pu P.Lalchhuanga leh MZU Vice Chancellor Prof. Lianzela te pawhin thu an sawi a. Chawhnu-ah thupui neiin Gender Equality and Women Empowerment chungchang zirhona hun an hmang a. Institute of Advanced Study in Education (IASE) Principal Dr.Vanlalhruaii; Prof. T.Vanlaltlani, Aizawl Theological College; Pu Lallianmawia, SP, CID Crime leh Sylvie Ralte, Chief Judicial Magistrate, Kolasib te thuziak zirho a ni.
