Social Welfare Department in hmeichhia hleilenna tuar leh baihvaite tana Durtlanga a buatsaih “One Stop Centre” (OSC) chu vawiin khan Social Welfare Minister Pu P.C Lalthanliana’n a hawng.

Social Welfare Minister Pu P.C Lalthanliana chuan hmeichhe baihvaite tana buatsaih Centre changtlung tak puitlin a lo ni ta chu lawmawm a tih thu a sawi a. Minister chuan  One Stop Centre-a thawktute chu mi chanhai leh enkawl harsate enkawltu an nih angin an hna a pawimawh hle thu a sawi a, inpekna rilru leh hmangaihna nen rawngbawlna rilru pu chunga thawk turin a chah. Sawrkarin hmeichhia harsatna tawkte tanpui tur leh hmeichhe dinhmun chawikang turin nasa taka hma an lak thu sawiin inchhungkhura hmeichhia dinhmun chhe taka awmte leh kuthhlak tuar thin te report-a  tanpuitu turin “Mahila Police Volunteer” scheme kalpui a nih thuai tur thu a sawi a.  Lunglei-ah OSC hawng tura phalna hmuh a nih tawh thu leh din tura chak taka hmalak mek a nih thu a sawi bawk. Social Welfare Minister chuan One Stop Centre chu mipuiten tangkai taka an hman chhunzawm zel a beisei thu leh Centre hmasawnna atan Durtlang khawtlang thlawpna an mamawh thu sawiin khawtlang hruaitute thawhpuiah a sawm nghal a ni.

One stop Centre hawnna inkhawm hi Social Welfare Department Director Pi Laldikkimi’n a kaihruai a, AMC Councillor Pi R.Zomuanpuiin thu sawina hun hmangin One Stop Centre thawktute inhmelhriatna hun neih nghal a ni a, Social Welfare Department Joint Director Pi Vanlalpianpuii’n lawmthu sawina in hun a khar a ni.

He hunah hian VOLCOM, Mizoram Positive Network, ICPS leh NGO hrang hrang hruaitute leh Durtlang Local Council, State Council for Child Welfare, State Social Welfare Board , leh Social Welfare Department hotute an tel a ni.

One Stop Centre hi Ministry of Women & Child Development bultuma hmeichhia hleilenna tuar leh baihvaite tana tlukluhna leh inhumhim lailawkna atana buatsaih a ni a. Hmeichhia he hmun pantute hi ni 5 chhung awm theiin an awm chhung hian ei leh in, riahna leh mimal nitin mamawhte a thlawna tumsak vek an nih bakah damdawia enkawlna, counselling leh dan leh hrai lama puihnate pek thin an ni. India ram state tinah OSC pakhat tal awm tura tih niin Mizoramah chuan kum 2016 October thla atang khan Women Helpline Khatlaah OSC chu kalpui tan a ni a, vawiin thlengin case 24 an buaipui toh a ni. One Stop Centre, Durtlang ah hian Centre Administrator Office, Staff Room ,Dressing room, Video conference room leh bedroom 2 awmin khum 5 a awm a, darkar 24 duty an awm reng dawn a ni.