1784/2023-2024

Aizawl, the 7th September, 2023: Sawrkar lapui Ministry of Social Welfare & Tribal Affairs hnuai National Education Society for Tribal Students (NESTS), Mizoram Eklavya Model Residential School (EMRS) Society leh Social Welfare & Tribal Affairs (SW&TA) Department, Mizoram tangkawpte buatsaih, 2nd Mizoram State Level EMRS Cultural & Literary Fest 2023, September ni 7-8, 2023 chhung awh tur chu vawiin chawhma dar 10:30 khan MZU Multipurpose Hall-ah Social Welfare & Tribal Affairs Minister Er. Lalrinawma, Mizoram EMRS Society Chairman ni bawk chuan khuallian niin a hawng. He hunah hian Pu David Zohmangaiha, AMC Corporator chu khualzahawm a ni.

Khuallian Social Welfare & Tribal Affairs Minister Er. Lalrinawma chuan Mizorama Eklavya Model Residential School hrang hrang 6 te tana Cultural & Literary Fest 2023 buatsaih a ni chu lawmawm tiin, rah tha a chhuah ngei a beisei thu a sawi a. Thu leh hlain thil a tih theih thu leh mi ngaihtuahna chena a thlak hlawk theih thu sawiin, thu leh hla avangin indona leh inremna Mizo history-ah ngei pawh hmuh tur a awm a ni, a ti. Kalkhawmte chu hnam nunphung leh ziarangte zahpui lova chawinung zel tura chahin, hnam ziarang leh nunphung hloh chu hnam bo zia a ni, a ti a. Kan hnam zia humhim hna hi midang kuta awm ni lovin keimahni ngei mawhphurhna a ni, a ti bawk.

Social Welfare & Tribal Affairs Department chuan hnam nunphung leh ziarang vawnnun kawngah theihtawp chhuah zel a tum thu tarlangin, September thla chhung hian Mim Kût hman tum a nih thu leh Mizo hmeichhiate humhimtu Zakapa hriat reng nan hmeichhiate dinhmun chawikawn leh humhimna kawnga thawk thate hnena hlan tur Zakapa Award, sumfai Rs 1,00,000/- leh thuziak cheimawi kengtel chawimawina kumin atanga sem chhuah tum a nih thu a sawi a. Zirlaite chu hnam rohlu, ziarang, tawng leh nunphungte chu tlawmte angin lang mahse zahpui lova chhawmnung zel turin a fuih a. Hlawhtlinna chang thei tura thahnemngai taka thiam thil zir tur leh, midang tana malsawmna ni tura theihtawp chhuah turin a chah bawk.

Khualzahawm Pu David Zohmangaiha, AMC Corporator chuan zirlaite chu thil dik leh tha nia an hriat ti puitling thei tura theihtawp chhuah thin tur leh hnam ziarang leh nunphungte vawnghimtu nih tum tlat turin a chah a. Ram leh hnam tana chhawrnahawm nih tum tur leh hnam ropui siam tura thahnemngai taka inzir turin a fuih a. Mamawh lem loh kan bula awmte chu hlawhchhamna leh phurrit min siam saktu an nih theih thu sawiin, zirlaite chu an tana tangkai leh mamawhte hriaa inhmakhua lawk thiam turin a chah bawk.

He hun kaihruaitu Social Welfare & Tribal Affairs Director Dr. Lalhriatzuali Ralte, IAS, Convener, Mizoram EMRS Society chuan kalkhawmte lawmna thu a sawi a. Rev. Dr. C.Vanlaldika, AICS Principal-in hunserh a hmang a. Zirtirtu leh zirlaite pual thutiam lakna hun Director kaihhruaiin neih a ni a. Pi C.Zodinpuii, Joint Director, SW&TW & CEO, Mizoram EMRS Society chuan EMRS report a pek bakah Fest hman chhan leh hemi chhunga hun hman dan tur tlangpui a tarlang a. Dr. R.Lalnunmawii, Deputy Director, SW&TA in lawmthu sawiin hun hman a khar a ni.

Mizoram State Level EMRS Cultural & Literary Fest 2023 hi September ni 7-8, 2023 chhunga neih tur niin, cultural leh literary item hrang hrang hmangin intihsiakna neih a ni dawn a. He hunah hian Mizorama EMRS 6 atangin zirlai leh zirtirtu 150 an tel a ni. Vawiin hian Literary Fest neih niin, naktukah Cultural Fest neih chhunzawm a ni ang a, kharna hun hman a ni bawk ang.

Social Welfare & Tribal Affairs Department tarlan danin Mizoram EMRS hmasa ber chu kum 2008 ah Lunglei Pukpui-ah din niin, kum 2015 ah Serchhip-ah din a ni leh a, kum 2020 atangin hmun 4 dang, Lawngtlai, Chawngte, Tuipang leh Ngopa ahte din a ni a, tun dinhmunah EMRS kalpui mek 6 a awm a. Kum 2023-2024 academic session-ah hian EMRS 6 ahte zirlai 1,210 an awm mek a ni. EMRS Lunglei leh Serchhip-ahte Class XII thleng zir theih niin, adang 4 ahte Class X thleng zir theih a ni a. Tih changtlun leh tul angte bawhzui kawngah dan anga hmalak zel a ni.

Mizoram EMRS Society hi kum 2020 ah din niin, tun dinhmunah Mizoramah Eklavya Model Residential School (EMRS) sak mek 5, No-aotla (Niawhtlang), Tlangnuam, Tlungvel, Bilkhawthlir leh Zawlnuam-ahte a awm a. Heng bakah hian EMRS din tura sanction hmuh tawh, buaipui tul dangte tihfel veleha sak mai theih 6, Khawbung, Khawzawl, Sawleng, Thiltlang, Lungsen leh West Phaileng-ahte a awm bawk.