No.4449/2021-2022

Aizawl dated 29th March 2022: Vawiin chawhnu khan School of Nursing, Thingdawl, Kolasibah zirlaite thutiam lakna hun țum hnihna '2nd Capping & Lamp Lighting' leh General Nursing and Midwifery 2nd Batch zirchhuakte thlahna hun hman a ni a. Pu K.Laldawngliana, MLA, Tuirial Assembly constituency chu khuallian niin Pi Lalbiaksangi, Jt. Director Nursing (rtd.) chuan thutiam lakna hun hi a kaihruai a ni.

Pu K.Laldawngliana, MLA, Tuirial Assembly Constituency chuan rinawmna leh dikna chu khawi hmunah pawh a dinchan thin thu sawiin mihring hriselna enkawl tur a hna pawimawh tak, Nursing hna chu rinawm tak a thawk turin a chah a. School of Nursing, Thingdawl atanga Mizoram Nursing Council exam-a Topper-an awm chu fakawm a tih thu sawiin Topper hnenah Cheng sing khat a ruahman thin tur thu a sawi bawk a ni. Pu K.Laldawngliana chuan hlawhtlinna dawng tur chuan taimakna nena beih a ngaih thu sawiin GNM zirchhuak tharte pawh tun a an hlawhtlinnaah duhtawk mai loin a tak a hna an thawh hun ah taimakna tilang zel turin a chah. SONT chu College-a hlan kai a nih theih nana hmalakna tur hrang hrangte chu a tul anga bawhzui zel a nih tur thu tarlangin a hmunhma tihchangtlun chungchangah pawh hmalak zel a nih tur thu a sawi a, Thingdawl khawtlang hruaitute leh Sawrkar department hrang hrangte nena thawhhona an lo kalpui tawhna chu lawmawm a tih thu a sawi bawk a ni.

Pi Lalbiaksangi chuan GNM zirchhuak tharte chu an mahni hnaa rinawm turin leh rintlak ni turin a chah a, eizawnna mai piah lam ah Nursing chu rawngbawlnaa ngai turin a fuih bawk a ni. Nunna hlu tak enkawltu tur an nih dawn avangin an hna chu khawvel a hna ropui ber a ni tih hriain inpekna thuk tak nena thawk turin leh intuaihriam reng turin a chah.

Pi Laltanpuii, Principal, SONT chuan report pein zirlai leh zirlai chhungte atangin thusawi ngaihthlak a ni a, Pi Mimi Lalmuanpuii, Tutor chuan kalkhawmte lawmna thu a sawi bawk a ni.

School of Nursing Thingdawl, Kolasib hi Mizoram sawrkar hnuaia GNM School pahnihna ni turin 11 December, 2017 khan tan a ni. Ministry of Health & Family Welfare, Government of India in bultanna tur sum pein Hospital & Medical Education, Health & Family Welfare Department hnuai a awm a ni a, a zau zawng hi 25595.60 Sq/metre a ni. Tun dinhmun ah School of Nursing, Thingdawlah hian Principal 1, Tutor 5, Warden 1, LDC 2, Driver 2, Group-D 4 an awm a, zirlai 61 an awm mek bawk a ni. SONT hian kum 2021 Mizoram Nursing Council Board Exam Final year result ah khan 1st Position, 3rd Position, 4th Position leh 6th Position-ah mi 3 leh 10th Position mi 2 ten an hauh a, vawiin khan GNM zirchhuak mi 17-te thlah an ni.