Kum 2013, June thla atanga vawiin thlengin Kelkang khua a harhna thleng chhim tura kal mi eng emaw zat an la awm reng a, hemi avang hian Kelkang chhung tlem awmna khua a ekin te chu a khatin, inthiarna mumal neilo an awm tawh avangin Mizoram sorkar chuan NLUP sum bank a dah pun hmangin hma a la mek zel a ni.

Sorkar chuan hriselna lam atan a hlauhawm thei dawn a a hriat avangin inthiarna mumal zawk a awmtheih nan tanpuina dang dang NLUP sum bank a dah pun hmangin hma a lak mek zingah ekin 200 sakna a siam.

Champhai D.C. Pu H. Lalengmawia, chuan Kelkang ekin 200 sakna hnatlang thei tur mi tlawmngai an mamawh thu a sawi a, chumi chu chhang nghalin nimin khan Champhai Zotlang Presbyterian kohhran atangin mi 36 in ekin khur laih hi an tan nghal a, vawiin khan Champhai Venglai Presbyterian kohhran atangin mi 100 chuan tlawmngaiin ekin khurlaih hna hi an chhunzawm bawk.

Tunhnai a Home Minister in Kelkang a tlawh tum khan mipui hriselna atana tul ni a ngaiin an ekin khat tawh paih fai hnathawh nise a tih chu Aizawl Municipal Council hotuten ngaipawimawhin Kelkangah Cess Pool (Ek Paihna) khawl pathum thawn chhovin, thenfai hna hi an thawk a, Septic tank pangngai anih loh vangin harsatna awm tura an ngaih laiin nimin chauhah khan ekin 24 chu fai takin paih faisak an ni chu khawtlang hruaitute an lawm hle.

Tui harsatna sutkian nan pawh NLUP a thawktuten Kelkang atanga Km 1½ chauhva hla Dilkawn a mi tui chawi theih nan JCB (Excavator) hmangin kawng an lai tan bawk.

NLUP thawktute chuan tuizem 30 a hmunah hian an thlen chho tawh a, hengte hi V/C leh khawtlang hruaituten an sem nghal a ni. Kelkang khaw harhna a mikhual leh a tualchhung mite harsatna sutkian nan hian mi thahnemngai ten thil tam tak an thawh avangin Kelkang khawtlang hruaitute an lawm hle a ni.