Chawlhkar 2 awh tur Special Handloom Expo 2012 chu vawiin chhun ar 12 khan ZOHANCO Chairman Pu Albert Lalthlamuana chuan Champhai-a I&PR Auditorium, CHANEM ah a hawng.
Hawnna thusawiin Khuallian chuan kan incheina leh kan puantah hian kan hnam zia a ti lang nghal a, Mizo puantah kan inbel chuan khawi hmunah pawh kal ila Mizo kan ni tih a lantir nghal zel a ni, a ti. Mizo puantah te hi a mawi em em a, hnamdang pawhin mawi min tih pui a, ram danga thawnchhuah tham tah thei ila hralh kal tak tur a ni, a ti. Pu Albert-a chuan Puantah hi engtiklai pawha thawh theih a ni a, nisa leh ruahsur, khawlum leh vawt hnuaiah pawh engtiklai pawhin a tah theih a, a hna a hahdamin a hlawk a, chuvangin hmeichhe tih tur chauhvah dah lovin Mipa te pawh hian eizawn nan hmang ila, hmeichhia aiin kan chak zawk a, kan tuan a rang zawk bawk a ni, a ti. Handloom ah hian Central ah sum hailuh tur tam tak a awm tih sawiin Khuallian chuan Mizoram Handloom tih hmasawn nan ZOHANCO pawhin Scheme a siam mek a, kan hlawhtlin ngei pawh kan beisei a, NEC kaltlang pawhin Fund hailuh dan kan dap mek a ni, a ti. Pu Albert-a chuan Puantahtute chu an puantah quality ti tha tura chahin incheina tlaka hman theih tura a finishing uluk turin a chah bawk a ni.
Hawnna inkhawm, Pu Lalremliana, Asst. Manager, ZOHANCO kaihhruaiah hian Khualzahawm Pu H.Lalmalsawma Managing Director, ZOHANCO pawhin thusawiin Handloom atang hian Central atangin sum hailuh tur tam tak a awm a, tuna Sopecial Handloom Expo kan buatsaih pawh hi chumi atana kan hmalakna pakhat a ni, a ti a, Handloom Expo hi Puantahtu ten an puantah mipui hnena an pholanna hun atan te, an hralhna tur hun siamsak nan te leh eizawnna tlak anih zia lantir nan te kan hmang a, hetiang huna rawn inpho te hnenah hian an kalman pawh kan tum sak vek thin a ni, a ti.
He hun hmang tura lokal Pu BB.Dutta, Dy. Director, WSC, Agartala pawhin thutawi sawiin Aizawl-ah Puantahna hmunpui din a tum thu a sawi a, hei hian Thalai tam takin hnathawh tur a siamsak bakah Puantah quality tha zawk a siam chhuah theih a beisei thu a sawi a ni.
Hawnna Programme hman zawhah Khuallian Pu Albert Lalthlamuana chuan Handloom Expo 2012, March 13-27 chhunga neih tur chu mipui tana dawr theih turin Ribbon chep chatin a hawng a ni.
