Mizo Students’ Union, Mizoram General Conference vawi 18-na, Bairabi-a ni 8.10.2019 zan a neih ah Pu Robert Romawia Royte, Minister of State for Sport & Youth Services chu Khuallian niin conference hawnna inkhawm a hmanpui.

M.S.U General Conference palai lawmna inkhawmah hian Pu Robert Romawia Royte chuan Palaite chibai bukin thu a sawi a, ruihhlo tellova harhfima MSU Conference hmang turin a chah. Ramri humhalh leh venhimna kawngah political party-in hamthatna lak tuma beih chi a ni lova, thalai, zirlai leh Zofa zawng zawngte tanrual a tul a ni, a ti. Zirlai kalkhawmte chu ruihhlo laka fihlim tur te, hlawhtling tlaka taima leh rim taka lehkha zir tur te, hriatna leh thiamna hi thiltihtheihna a ni tih hre turtein a fuih. Sorkar hmalaknate zir chianga a tul hunah thurawn pe a, a tul anga ram hmasawnna tura sorkar tawiawm turin Zirlai kalkhawmte a sawm a ni. Minister hi Dr. K.Pachhunga, MLA leh mi pawimawh dangten an tawiawm  ni.

Sports Minister hian Kawnpuia Boys Hockey Academy leh Hockey Ground a tlawh a, thawktute leh zirlaite nasa zawka tan la zel turin a fuih thar a, Kolasib Tourist Lodge building tlawh leh in building sak a that tawk loh avanga a him leh him loh endiktu, Inspection Team-te nen engtia kalpui tur nge tih an sawi ho a ni. Khualzin mi, he Lodge-a thlengte tan a him zawk nan a building sak that a tul thu te an sawi ho a, a sak that dan tur kawng ngaihtuaha hmalak tan tul a tih thu a sawi bawk a ni.

Tourist Lodge a tlawh zawh hian Regional Sports Training Centre, Kolasib Saidan-a Football Ground phullem phah hnathawh kal mek a tlawh a. He Football ground siam mek hi kumin December thlaa hawn theih tura tan la turin mawhphurtute a hrilh. He Training Centre-a Academy zirlai, Subroto International Football Tournament, 2019 Under-14 a Champion team te kawmin a lawmpui thu a sawi a, thahnemngai lehzuala Zofate leh Mizoram tihmingtha tura tan la deuh deuh turin a fuih.

Pu Robert-a chuan Mizoram sorkar leh Sports department chuan Sports person-te a ngaih pawimawh thu sawiin, amah pawhin Sport Minister a nih angin infiammite hmasawnna chu a ngaihpawimawh ber a nih thu a sawi.

Pu Robert-a chuan M.Z.P ten Mizoram leh Cachar ramri Zophaia Chawlh Bûk sak an tumna hmun a tlawh a. Ramri-a I.R police duty te pawh thlamuanin, sakhuana inzahsak tak chunga huaisen leh rinawm taka ramri venhimna kawngah an duty thawk turin a fuih.