Vawiin khan Sports &Youth Services Department chuan an kum 25 tlin lawmna chu Aijal Club-ah an lawm a. Sports Minsiter Pu Zodintluanga chu khuallian a ni.
Sports Minister chuan hun pawimawh leh tawn fuh har tak hmang theia a awm chu vanneihthlak a tih thu sawiin Sports Department in kum 25 hmel a hmuta chu lawmawm a tih thu a tarlang a. Sports Department chu mipui hnaih tu ber leh Sports Association hrang hrang te nena inhne renga thawk tlang, nakin lawka ram hruaitu tur thang thar tam tak inthununna tha tak nena kaihhruatu, Catch Them Young kaltlanga naupang tam tak infiamna chi hrang hranga zirtirna tha tak petu an ni tiin he Department kaltlang hian Mizoram siamthat a nih ngei a beisei thu a sawi. Pu Zodintluanga chuan sorkarin infiammi te hmasawn nan hmun leh hmanraw tha a pawimawhzia hriaa nasa taka infrastructure development lamah ke a pen thu sawiin an hmalakna chi hrang hrang a tarlang a, chung zingah chuan Aizawl Sipai Lammualah bakah Rajiv Gandhi Sports Stadium, Mualpui leh Lunglei Thuamluaia Mualah te hnim lem phah tura kalpui mek a nih thu te; PYKKA kaltlanga thingtlang khaw kilkhawr tak takah khelmual an laihsak thu te; Kolasib Saidanah Academy changtlung tak siam mek a nih thu te leh District tinah Sports a hma an sawn theihna turin nasa taka hma lak a nih dan te a tarlang.
Minister chuan infiammite chu India ram chhunga inelna mai ni lo khawvel pum huap inelna a lawmman la thei tura inpuahchah turin a fuih a. Kum reilote chhungin National level-ah Mizo infiammiten lawmman tam tak an hawn tawh ang hian International Level lamah tan la turin Sports Department a thawktute leh Association hrang hrang hruaitute a fuih a ni. Sports ngawr ngawr piahlamah Youth Affairs hnuaiah peng hrang hrang a awm thu sawiin Minister chuan pheikhai rual taka hma an sawn a tul thu a sawi bawk.
Sports and Youth Services Department hi 1972 khan Education & Social Welfare Department hnuaiah Youth Welfare, Scouts & Guides Activities Cell angin a ding tan a, December ni 1, 1986 ah Directorate puitling a hlan kai a ni. Youth Services hnuaiah hian Bharat Scouts & Guides, NCC, NSS, Youth Hostel Association leh Adventure te a awm a. Kum 25 chhung hian hmasawnna chhinchhiahtlak tam tak a hmu a ni. Cadet tlem te neia bul tan NCC pawhin Cadet 5000 chuang nei tawhin tunah hian Air Squadron hawng turin a inpuahchah mek a, thlawhna pahnih Mizoram tana dah (allot) tawh chu enchhin mek niin thla thum hnuah chuan Mizorama phurh chhoh hman beisei a ni.
Sports & Youth Services Department Director leh he Jubilee lawmna kaihhruaitu Pu Zoliana Royte chuan kum 25 chhunga an Department than chhoh dan tlangpui a tarlang a. Special Secretary Pu R. Lalvena pawhin thusawina hun a hmang bawk.
