Mamit District chhunga infiammi titha te hnenah Mizoram Sports Incentive Cash Award vawiin khan Chhim Veng YMA Hall, Mamit-ah sem a ni a, Pu Lalrobiaka,Chairman ZIDCO in a hmanpui.

Pu Lalrobiaka chuan thangtharte infiamna lamah hma an sawn zel chu lawmawm a tih thu a sawi a. Infiammi te chu hmasawn zel duhna thinlung pu a, mahni invawng tha a, taimakna leh tumruhna nena bei zel tur a fuihin, sorkar pawhin theihtawp chhuah hma a lakpui zel dawn che u a ni a ti.

Sports Incentive Cash Award hi kum 2012-2016 chhunga infiamna hrang hrang a state level, national level leh international level a medal la te hnenah pek a ni a. Vawiin a pawisa fai semchhuah zat hi Rs.4,61,750/- niin, infiammi 35 hnenah hlan a ni.