Vawiin chawhma khan Sports & Youth Services Minister Pu Robert Romawia Royte hovin 15th State Level National Service Scheme (NSS) Advisory Meeting chu a pisa-ah neih a ni.

Meeting-ah hian Awareness Campaign thupui neih tawh thin 10 bakah Social Media hmandan dik leh Disaster Management Early Response inzirtirna neih belh ni se, tih rel a ni a. Kum 2019-20 atanga Zobawk Higher Secondary School leh Farkawn Higher Secondary School te’n nikum lama NSS Unit din an dilna chu rem tih niin, Mizoram School leh College Institution a NSS Unit nei 84 an tling ta  a ni.NSS Golden Jubilee (24th September) lawm nan Aizawl District-ah chauh nilo, District khawpui hrang hrangah te pawh a ropui thei ang bera lawm rem tih a ni a. Kum 2019-20 chhungin NSS Volunteer-te chu a huhova AR Ground leh Chite Lui tih fai hnatlang neih ni se tih remtih a ni a, volunteer ten thingkung a tam thei ang ber phun tura rel a ni bawk a ni.

State NSS Officer cum Deputy Secretary, Dr. Zirlianngura  chuan Kum 2018-19 chhunga NSS hnathawh hrang hrangte report a pe a.  Damlo leh mamawh a piangte hman turin Voluntary Blood Donation Camp vawi 76 huaihawt atangin thisen Unit 4921 lai pek a ni a. Mizoram hmun hrang hrangah mipui vantlang hman turin Zun In, Public Water Point, Waiting Shed, Public Bathroom leh thildangte siam a ni a, zirlaite zingah thupui hrang hrang Drug Abuse & HIV/AIDS/Tobacco Control, Solar Energy Conservation, Human Trafficking & Child Protection, Organic Farming leh adangte inhrilhriatna neih thin a ni. Faina hnatlang hmun hrang hrangah neih thin a ni bawk a ni.

Meeting-ah hian Pu H.Lalengmawia, IAS Secretary, Sports & Youth Services Department; Pu C.Lalsangzuala, Additional Secretary, Sports & Youth Services Department, Pu R.Lallianzuala, Director, Higher & Technical Education leh midangte an tel a ni.