Vawiin khan Sports and Youth Services Minister Pu Zodintluanga pisa-ah 6th Golden Gloves of Vojvodina- Youth Women Boxing Tournament Vojvodina, Serbia-a neih taka 60kgs category inelna a Gold Medal latu Vanlalhriatpui, Champhai Vengthar chawimawina hun hman a ni a. He hun hi Sports and Youth Services Department Secretary Pu H.L. Rochungnunga, IAS leh department officals dang te; Mizoram State Sports Council Secretary Pu C. Laltlanthanga leh officials te bakah Sports Association hrang hrang aiawhten an hmanpui. 

Sports Minister Pu Zodintluanga chuan Mizo infiammi khawvel huapa Gold Medal dawng chawimawina hun lawmawm tak hman a ni leh thei chu Pathian malsawmna a ni a ti a. Mizo infiammite hmakhua ngaiin sorkar chuan infrastructure pawimawh hrang hrang a din bakah naupang leh thalai zawkte a chher chho a, tunah chuan heng training tha taka dawngte chuan ram tan hmingthatna leh lawmman an rawn hawn ta fo hi a lawmawm takzet a ni, a ti. Foreign emaw national coach emaw chhawr duh Sports Association-te tan sum cheng nuai 25 dah a ni chungin Association ten hei hi an hmang tangkai ta lo chu pawi a tih thu a sawi a, tunah chuan cheng nuai 3 chauh dah a ni tawh tih a sawi bawk. Vanneihthlak takin Badminton Association chuan Malaysian coach an ruai hlauh a, Tennis leh Aquatics lam zirtir turin national coach rawih an ni mek bawk tih a sawi a. Sorkar chu infiammite hmasawnna kawngah a inhuam thui hle a, hei hi Sports Association ten tun aia an bawhzui leh hman tangkai an thiam a ngai a ni, a ti bawk. Boxing lamah Mizoram tihmingthatu boxer an awm thin chu a lawmawm hle a, Mizoram Boxing Association hmalaknaah pawh lawmthu a sawi.

Minister chuan thu a sawi zelnaah Mizo infiammite talent leh skill lamah duai lo mahse hriselna leh fitness lamah tun aia nasa zawka an beih a tul a, gym leh fitness centre tha tak tak awmte hmang tangkai turin a chah a. Minister hian Gold Medalist Vanlalhriatpuii hnenah ram aiawha international tournament-a chakte hnena pek thin Kit Allowance cheng 10,000/- hlan nghalin a kal zelna turah duhsakna a hlan nghal bawk a ni.  

6th Golden Gloves of Vojvodina- Youth Women Boxing Tournament hi 8th-14 August, 2017 khan Vojvodina, Serbia-a neih a ni a, ram hrang hrang 15 an tel a ni. 

Vanlalhriatpuii hi Pu Z.H Zoliana leh Pi Ngunliannguri te fanu niin, ni 6.9.1999-ah a piang a, Champhai Vengthar-a khawsa an ni. Boxing zirin SAI Mission Vengthlang-ah a awm a. Vanlalhriatpuii hlawhtlinna lo chan tawhte chu a hnuaia tarlan ang hi a ni:

1. India aiawhin Vojvodina, Serbia-a 6th Golden Gloves Competition, ni 9th- 14th August 2017 chhunga neih, light weight (60kg) category-ah Gold Medal a dawng a. Gloden Gloves Championship-ah hian ram 15 telin, Vanlalhriatpuii hian quarterfinal-ah Russian boxer hnehin semi final a lut a, final-ah tunlai Amateur Boxing-a khawvela tha ber pawl Kazakhstan mi hnehin a champion a. Hei bakah hian Best Technician Boxer-ah thlan a ni bawk. 

2. Vanlalhriatpuii hian 6th Golden Gloves Competition-a a tel hmain Kazakhstan-ah training cum competition 27th July 2017 - 7th August 2017-a neihah a tel bawk.

3. Kum 2017 January-a Delhi khawpuia 1st Youth Men & Women National Championship-ah lightweight 60kg-ah champion-in, Most Promising Boxer-ah thlan a ni. A khelhna weight hi Olympics Women Boxing-a weight category-ah a tel.

4. 6th Golden Gloves Competition-ah hian India team chuan a vaiin medal 10 (Gold 2, silver 4 & bronze 4) an la a, Hriatpuii bakah Jyoti chuan 51 kg-ah gold medal a dawng bawk.